Presidente di Sindicato “Federacion Trahadonan di Aruba” (FTA), Hubert Dirksz, a compronde cu un grupo grandi di trahadonan di Aruba Airport Authority N.V. a aserca nan sindicato pa representa nan interesnan. Dirksz ta papia di un cantidad substancial di empleadonan cu a pidi pa bira miembro di FTA.
Awor cu a yega na e punto cu tur esunnan interesa a cumpli cu tur e rekisitonan, FTA a manda pidi un referendum na Mediador di Gobierno. “Nos ta papia aki di riba 100 trahado cu a pidi afiliacion di biaha pa atende nan asuntonan.”
Mediado di Gobierno a publica awe den corantnan e peticion pa desde awe 19 di juli y pa 14 dia venidero, tur otro sindicato cu ta interesa por participa na un referendum cu e lo organisa den e compania. Manera ta conoci, pa hopi aña Sindicato di Trahadonan di Aruba (STA) encabesa pa Diego de Cuba ta representa su coleganan di Aeropuerto. Pero for di momento cu e sindicalista a acepta un funcion como consehero/coordinador di Minister Glenbert Croes, cu miembronan na varios compania cu e ta representa a cuminsa protesta y awo ta mandando un mensahe cla cu no por mescla politica y sindicalismo.
Un Presidente di un sindicato cu mester lucha pa e clase trahado, cu fix su mes un salario of funcion adicional den Gobierno, no lo por conta mas cu e sosten di antes. Trahadonan ta sinti nan mes defrauda awo y ta comosifuera cu interes personal a surpasa interes sindical.
FTA a tende di problemanan cu tin andando. “Nos no a cera porta pa nan y di biaha ta bay atende nan problemanan.” FTA no sa ainda exactamente tur e problemanan, pero mayoria biaha ora cu trahadonan dicidi di busca of cambia sindicato ta pasobra nan ta malcontento den e situacion cu nan ta. E malcontento ta bini di trato no corecto di compania, kisas nan beneficio no ta manera mester ta of nan relacion cu sindicato no ta den e miho forma. Esaki ta haci cu nan ta busca otro sindicato.
Dirksz a bisa cu semper den situacionnan asina ta pidi referendum. E responsabilidad ta di Mediador di Gobierno ta pa haci un peticion na e compania pa wordo reconoci. Despues ta bay mesa pa firma un Protocol y djei cuminsa negociacion pa un CAO.
Si gerencia di A.A.A ta di acuerdo por pasa over pa atende di biaha cu e problemanan.