Trahadonan di Aeropuerto uniendo na sindicato FTA

Presidente di Sindicato “Federacion Trahadonan di Aruba” (FTA), Hubert Dirksz, a compronde cu un grupo grandi di trahadonan di Aruba Airport Authority N.V. a aserca nan sindicato pa representa nan interesnan. Dirksz ta papia di un cantidad substancial di empleadonan cu a pidi pa bira miembro di FTA.

Awor cu a yega na e punto cu tur esunnan interesa a cumpli cu tur e rekisitonan, FTA a manda pidi un referendum na Mediador di Gobierno. “Nos ta papia aki di riba 100 trahado cu a pidi afiliacion di biaha pa atende nan asuntonan.”

Mediador di Gobierno, Anselmo Pontolius, un ex sindicalista di hopi experiencia, awor lo mester maniobra memey di e dos sindicatonan aki pa laga trahadonan dicidi ken nan kier pa representa nan. Hecho ta cu e CAO vigente awor di STA ta keda riba mesa, te pra e caduca. Asina mes un grupo (grandi) di trahadonan ta insisti cu nan kier uni na e famia di FTA.

Mediado di Gobierno a publica awe den corantnan e peticion pa desde awe 19 di juli y pa 14 dia venidero, tur otro sindicato cu ta interesa por participa na un referendum cu e lo organisa den e compania. Manera ta conoci, pa hopi aña Sindicato di Trahadonan di Aruba (STA) encabesa pa Diego de Cuba ta representa su coleganan di Aeropuerto. Pero for di momento cu e sindicalista a acepta un funcion como consehero/coordinador di Minister Glenbert Croes, cu miembronan na varios compania cu e ta representa a cuminsa protesta y awo ta mandando un mensahe cla cu no por mescla politica y sindicalismo.

Un Presidente di un sindicato cu mester lucha pa e clase trahado, cu fix su mes un salario of funcion adicional den Gobierno, no lo por conta mas cu e sosten di antes. Trahadonan ta sinti nan mes defrauda awo y ta comosifuera cu interes personal a surpasa interes sindical.

 

Hubert Dirksz tin hopi aña trahando den Sindicato FTA y pa e ultimo añanan ta sinta den e funcion di Presidente. El a tuma e sindicato for di un posicion di caida y ta cambiando awo pa un status di crecemento continuo. E ta kere hopi den “gana un referendum no ta nada, cera CAO pa e trahadonan ta e cos”. E ta bisa esey pasobra otro sindicatonan ta gaba masha ora nan haya representacion di trahadonan den un compania pero despues e trahadonan no ta tende nunca mas for di nan.

FTA a tende di problemanan cu tin andando. “Nos no a cera porta pa nan y di biaha ta bay atende nan problemanan.” FTA no sa ainda exactamente tur e problemanan, pero mayoria biaha ora cu trahadonan dicidi di busca of cambia sindicato ta pasobra nan ta malcontento den e situacion cu nan ta. E malcontento ta bini di trato no corecto di compania, kisas nan beneficio no ta manera mester ta of nan relacion cu sindicato no ta den e miho forma. Esaki ta haci cu nan ta busca otro sindicato.

Diego de Cuba a tuma rienda di Sindicato STA den un status di caida. El a sa di crece e cantidad di miembronan haciendo e sindicato un di esunnan di mas grandi na Aruba. Su forma di papia y lucha pa trahadonan a bira su exito. Pero awor e ta sufriendo di su mesun exito pasobra den mayoria caso e no por cumpli cu locual el a priminti. Probablemente falta di conocemento sindical of e arte di negosacion ta hiband’e awo na perdida di miembrecia un tras di otro.

Dirksz a bisa cu semper den situacionnan asina ta pidi referendum. E responsabilidad ta di Mediador di Gobierno ta pa haci un peticion na e compania pa wordo reconoci. Despues ta bay mesa pa firma un Protocol y djei cuminsa negociacion pa un CAO.

Si gerencia di A.A.A ta di acuerdo por pasa over pa atende di biaha cu e problemanan.

Noticia relacionaMas for di e autor