Trahadonan Cuido Salud Hubenil cansa di traha pa mas cu un aña den koffiekamer

Diaranson mainta e grupo di trahadonan di e seccion di Cuido di Salud Hubenil di Departamento di Salubridad Publico (DVG) a dicidi cu ta suficiente y a tene un accion di protesta dilanti sede di DVG. Nan no tin un luga adecuado pa sinta, ta e punto di nan malcontento.

E motibo di nan protesta ta cu nan a haci varios intento, mandando carta, pidiendo un solucion pa nan por haci nan trabou debidamente y no ta haya reaccion. Nan a wordo saca di e area unda nan tabata ubica pa motibo cu e luga tabata den mal estado. 

Sharon Everts ta vocero di e trahadonan aki a splica cu desde april aña pasa nan edificio a wordo “afkekeurd” y mester a bandona e luga. “For di e momento ey nos no tin un edificio propio. Nos a haci tur intento pa e trabou por sigui, pero e ta birando imposibel y esey ta inaceptabel.” Esey ta e motibo cu a entrega na e Management Team y nan hefe directo un carta, pa despues entrega un copia di e carta na Minister Dangui Oduber. E ta un carta firma pa tur e personal di e accion aki di DVG. 

Empleadonan di e seccion "Jeugd Gezondheidszorg" na Directie Volksgezondheid Aruba (DVG) ta den protesta:Gobierno no ta reacciona despues di mas cu un aña y cuater luna wardando solucion. A saca nan di Edificio di DVG sin logra muda nan pa un otro!

Posted by 24ora on Wednesday, August 14, 2019

 

Tanto Management Team como hefe di seccion ta na altura di e problema aki, y nan mes tambe a manda varios carta pa Minister pidiendo pa un solucion, mirando e situacion cu e trahadonan ta den dje.  Segun Everts, nan mes a busca diferente opcion y solucion Pero mayoria di nan material y mobilario ta den e edificio bieu, den van Leeuwenhoekstraat, y nan no por wordo hiba na unda nan ta. Tin biaha nan ta traha den koffiekamer, sala di reunion chikito of otro departamento. E ta fastioso pasobra ta sinta riba stoel- y mesanan cu a wordo “afgekeurd”, no tin nan materialnan di trabou cu nan, no tin computer tur ora den cercania, ta inaccesibel pa e clientenan, pasobra no sa fiho unda nan ta sinta. “El a bira un situacion imposibel pa nos sigui traha.”

Dia 5 di juli ultimo, e grupo a sinta cu nan Minister unda a trece tur e preocupacionnan aki dilanti y a propone un solucion na e mandatario. Na final a yega na un palabracion esaki ta encera cu asina cu scol cuminsa, si e edificio riba Caya Watty Vos no keda cla, e mandatario lo ubica nan den un otro edificio cu ta cla caba pa sigui cu nan trabou. E mester ta un edificio adecuado pa ubica e 20 personanan cu ta traha den e seccion aki. Pero no a cumpli cu ningun di e dos opcionnan aki, pa cual nan a dicidi di pone trabou abou. 

Mester a haya un contesta definitivo dia 19 di juli, pero no ta logra haya contacto of reaccion di e mandatario. Inclusive nan sindicato TOPA tambe a haci algun intento pero sin resultado. Algun di e empleadonan a bay wak e espacio concerni y esaki tabata “curu curu”, pues nada a wordo haci eynan pa nan por drenta e luga. Ademas, e ta chikito pa e cantidad di hende. E mandatario a bisa cu e lo ta cla den ocho (8) siman, pero e periodo aki a pasa caba siman pasa diabierna. 

E falta di luga adecuado ta nifica cu nan campaña di vacunacion escolar no por sigui, control medico na scol y consultanan di baby tampoco lo sigui. Tin proyectonan andando den area di promocion di salud cu tambe lo keda pega. “Nos ta duna Minister 48 ora y ta spera cu den e periodo ey e tin un contesta satisfactorio pa nos. Si nos no haya e contesta nos lo no reanuda trabou. Nos a warda asina hopi caba, a demostra hopi pasenshi, a duna hopi di nos parti y awo nos ta spera e Minister cumpli di su banda pa busca solucion rapido pa nos.”

Den e carta entrega na sra. Joan van Heynigen, hefe di Management Team y Crystal Brown (Afdelingshoofd), ta papia cu nan a spera un aña y 4 luna. Ta papia di un edificio cla cu nan por drenta cu e 20 persona cu ta traha den e seccion. Ta pidi comprension di e hefenan pa e motibo di nan accion. Sra. Van Heynigen a splica cu e ta compronde nan situacion y e importancia di e trabou cu e seccion aki ta haci. Y e ta spera cu nan haya un contesta pa nan traha debidamente pa Aruba. 

E hefe di Management Team a bisa cu e mes a bay controla e edificionan cu a wordo menciona y hasta el a bisa e mandatario recientemente cu ta urgente pa haya un luga y e mandatario a bisa cu e ta consciente di esey. “Urgencia no ta spera un aña y mey pa solucion, e solucion mester bini mas lihe posibel.” Inclusive e hefe aki como parti di e seccion Hubenil, no tin luga di sinta ora cu e caba cu su trabou di Management Team. “Nan mester haya contesta, nan a mustra hopi pasenshi.”

El a priminti e trahadonan cu lo tuma contacto cu e Minister pidiendo atrobe pa un bon solucion. “Mi tin aprecio pa e trahadonan aki cu a traha un aña y 4 luna den situacion cu otronan lo no acepta. Hasta e administracion di e seccion aki ta mobil awo. E ta bira tempo pa nan haya un luga unda nan ta sinti nan mes comodo y ricibi e clientenan.”