Trahadonan di Bibliotheek ta sin airco na trabou desde diabierna ultimo. Empleadonan a keha awe di holo stinki y di un calor inmenso, cu ta stroba nan di por traha.
Dialuna a manda trahadonan cas pasobra no por a traha den e calor. Diamars trahadonan a regresa trabou y mester a keda traha normal, bou circunstancianan masha desagradabel. Pero awe diaranson si awa a pasa hariña. E empleadonan a rabia ora cu a bisa nan cu mester keda traha. E ora trahadonan a protesta y a opta pa bay sinta pafo te ora yega na un solucion.
Mientras cu nos tabata eynan a nota presencia di Pro-Tec, e compania cu a instala e airconan. Tambe a topa cu gerencia di e compania ACC y ora nos a puntra si nan lo instala airco nobo pa Bibliotheek, nan a contesta “A bin wak e situacion y wak si por duna un asistencia pa bibliotheek por haya airco bek.”
