Diabierna, durante dia, un empleado di un restaurant na aeropuerto, a keda deteni despues cu el a purba di pasa un of mas tas cu droga. El a probecha di su funcion na aeropuerto como empleado di un restaurant cu ta bende cuminda Italiano.
Mainta el a yega pasa siguridad di aeropuerto, sin cu el a wordo detecta cu e tas carga cu 12 paki di cocaina. El a pasa siguridad di AAA.
Despues el a bay purba di pasa e siguridad di e di dos security point di AGS. Den e di dos aki a par’e y a bin resulta cu e tabata tin un rugtas cu tur e pakinan di droga aden. Ta wordo bisa cu el a yega di pasa un biaha, pero na di dos a par’e. Pero no por confirma esaki ainda.
Despues cu el a wordo gara, a constata cu tabata tin cos straño. A bay cun’e y a notifica personal Douane Recherche.
Ora cu el a pasa prome, e di dos ta pa drenta teritorio Mericano. Eynan un hende lo mester a bin tuma e tas y bay cun’e Merca. Pero nan a gar’e. No sa cuanto biaha caba el a yega di haci’e.
E persona aki, segun informacion ta conoci como “Kleine”. Awor aki Departamento di Droga, despues di a tuma e caso over, a cuminsa cu un investigacion profundo pasobra tur cos ta indica cu na aeropuerto mes ta sospecha cu lo por tin hende di siguridad di AAA envolvi den e caso aki.
Pasobra ta sospecha cu nan lo a coopera pa lage pasa bay cu e droga. Pero den e di dos control di siguridad, eynan si e no a logra pasa nan, pasobra nan a mira cu tin cosnan sospechoso ora cu nan a pasa e tas den e scanner y a ripara cu e persona aki su rugtas, cual tabata preto, tin cosnan sospechoso den dje.
Como trahado di restaurant, ta hende cu mester pasa cos asina. Por pasa carga pa restaurant, pero no tas cu paki aden. Eynan el a lanta sospecho y a gar’e. Por spera mas detencion un ora pa otro, entre otro trahadonan di AAA cu ta traha na siguridad.
Investigacion ta sigui y durante oranan largo awe, departamento di droga tabata presente na aeropuerto pa vigila e situacion, pa asina saca afo tur e movecionnan di Kleine y tambe di siguridad di aeropuerto.
