Diamars anochi, net algo prome cu 9’or, a sosode un incidente riba Juancho Irausquin Boulevard na altura di Barcelo Hotel & Resort. Un trahado cu tabata yegando trabao den bus di Arubus, e momento cu el a bay baha for di e porta patras, ora cu el a bay tira e ultimo stap pa baha e step di e bus, segun e ta bisa, e bus a hala un tiki dilanti, probablemente pa un descuido di e chauffeur y a hera y a cay.
El a cay dal su curpa. E bus a para mesora. E señora, kende ta un trahado di Barcelo, a keda benta abao y tabata keha di dolornan fuerte. Ta trata aki di un dama cu net recien a caba di opera lomba. Esey a causa cu e no por a move y tabata benta riba su lomba cant’i caminda, banda di e porta patras di e bus.
Polis di Strandpolitie y otro unidadnan a yega rapidamente na e sitio. Tambe a pidi presencia di ambulance cu urgencia. Paramediconan di ambulance a yega na e sitio. Nan a atende rapidamente cu e señora, a logra lant’e den forma tactico y asina transporte pa hospital, caminda dokternan tambe a prepara pa su yegada.
E tabata na tino, e no ta grave, pero si e dolornan. E tabata keha di dolornan fuerte di e lomba cu recientemente a wordo opera.
