Diabierna atardi a tuma nota di varios unidad di polis direccion Arashi. Un grupo di por lo menos cincuenta hoben riba bicicleta tabata causando consternacion den trafico.
For diferente sitio a yama y pidi presencia di polis pa e grupo grandi aki di hoben riba bicicleta cu tabata maneha den forma peligroso. tabata manda bicicleta directamente riba trafico contrario y tambe tabata tin trafico malamente pega. Na momento cu a topa cu e grupo prome biaha, polis a actua contra nan den area di Palm Beach caminda a confisca cinco bicicleta na sitio.
Mientrastanto a sigui patruya y a bin topa den area di Malmok (Tres Trapi) aproximadamente cincuenta hoben riba bicicleta. Polis a pidi versterking di demas colega, a cera ambos banda di caminda pa asina ningun por a scapa y bandona sitio.
Polis a informa cu ta confisca tur bicicleta.
Varios hoben a rabia y insisti cu nan no ta forma parti di e grupo y cu nan no ta esnan cu a pone trafico den peliger. Tambe nan a vocifera di no tin otro manera di yega cas si acaso confisca e bicicletanan, a boga na e autoridad pa laga e incidente aki pasa pa e biaha aki y duna nan un chens.
Esey no a socode. A pidi presencia di varios pickup y demas patruya pa asina colabora y transporta e bicicletanan pa warda. A confisca tur bicicleta presente.
