Awe Corte a trata e caso penal contra e homber Eduardo Thiel, acusa di a comete acto inmoral cu un mucha homber di 13 aña di edad. El a pidi e mayornan despensa, pero esey no a scap’e di castigo di prizon condicional, combina cu trabou obligatorio na comunidad.
Ministerio Publico ta acusa Eduardo Thiel di a comete actonan inmoral cu un mucha homber di 13 aña, entre dia 1 di Maart 2017 y 16 di Juni 2017. E mama a entrega keho ora el a ripara comportacion straño di su yiu y a papia cu su yiu, kende a bis’e cu Eduardo Thiel a tene su parti intimo 5 biaha y un biaha a gara su cara tene y dun’e sunchi den boca. E yiu a bisa e mama cu el a purba kita su cara pero Eduardo Thiel a tene duro. Esey a duna e yiu un rabia riba e abusado!
Hues a constata cu Thiel a admiti e hechonan na Polis y cu el a pidi e mama despensa. El a haci e acto inmoral debi cu, segun e acusado, cu e mucha tabata haci mucho wega di man. Segun Thiel, no tabata su intencion pa haci acto inmoral na e mucha.
Na final di tratamento di e caso, Hues a dicidi di dicta sentencia mesora, basa riba demanda di Fiscal. Hues a bisa cu e ta haya legalmente proba cu Eduardo Thiel a haci actonan inmoral cu e mucha homber di 13 aña. A mishi/tene e mucha na su parti intimo diferente biaha y a sunchi den boca. Hues a lamenta cu Eduardo Thiel tabata un amigo di famia y a abusa di e confiansa pa tene e mucha su parti intimo y sunchi e mucha na boca. Hues tabata di acuerdo cu e castigo exigi pa Fiscal. E Magistrado a condena Eduardo Thiel na 120 ora di trabao pa comunidad y si no cumpli e lo mester bay 60 dia cera. Tambe Hues a conden’e na 2 luna di prizon condicional cu un tempo di prueba di 2 aña.
