Bientonan di horcan cu a dal central y nort di Portugal, a laga 300 mil cas sin coriente.
Restonan di Horcan Leslie a pasa durante anochi diasabra, cu bientonan sosteni di 176 kilometer pa ora.
Oficialnan di defensa civil a bisa cu 27 persona a surfi di heridanan menor, y inundacion local, cientos di mata ranca y un cantidad di vuelo cancela.
E tormenta, un di e mas poderosonan cu a yega di dal e pais, awo ta pasando riba e parti nort di Spaña.
E areanan cu mas a afecta na Portugal, ta rond di e capital Lisboa, y den districtonan di Coimbra y Leiria, Aveiro, Viseu y Porto parti nort, tambe a sufri daño.
Mas of menos 1000 mata a wordo ranca for di nan rais, oficialnan a bisa. E caretera A1 tabata entre e camindanan cu temporalmente a keda blokia.
Mas of menos 1900 incidente a wordo reporta na servicionan di emergencia, aunke cu e comandante di defensa civil, Luis Belo Costa a bisa “e peliger mas grandi a pasa.”
Cientos di persona a permanece den un centro di arte na Figueira da Foz despues di un concierto pa motibo di bientonan fuerte.
Un residente di e pueblo a conta television SIC: “Nunca mi a mira algo asina. E pueblo parce di ta den un estado di guera, cu autonan placha pa matanan cu a cay. E hendenan ta hopi preocupa.”
Daknan a bula bin den un stadion, cu tabata anfitrion di e final Europeo di e competencia di hockey femenino, parando e evento, e agencia di noticia di AFP a reporta.
E ta straño pa un horcan di Atlantico pa yega e peninsula Iberico, cu tin solamente cinco di e tipo di eventonan aki registra.
Horcan Leslie a forma riba dia 23 di September, pero a wordo degrada na un tormenta tropical, prome cu el a yega tera. Sinembargo, e rafaganan reteni tabata cu forsa di un horcan.
E agencia Spaño Meteorologico (Amet) a bisa cu Leslie tabata moviendo noordoost riba e peninsula.
Bientonan di casi 100 kilometer a wordo registra cerca di e ciudad di Zamora tempran riba diadomingo, pero bientonan a baha nan intensidad.
Amet a bisa cu riba diadomingo mainta, areanan grandi di Asturias, Castilla y Leon y Cantabria lo wordo afecta, cu areanan noordoost parti atardi.
Cuater departamento den a parti sur di Francia tambe a wordo poni na alerta pa tormenta y inundacion.
