Despues di mas cu 10 aña: Tormenta di sneeuw na Hulanda

1427

Hulanda den fin di siman a confronta un estado di clima intenso, cu caida di masha hopi sneeuw mes. Esaki a bin compaña cu biento hopi fuerte. A yama e tormenta aki “Darcy”.

Instancianan concerni ta papia di un tormenta di sneeuw cu compaña pa biento fuerte a causa basta problema den trafico, segun e coresponsal di 24ora.com na Hulanda, Godfriend Adem, a comenta. A haci apelacion na pueblo, cu no tin nada di haci riba caya, pa nan keda cas.

Sneeuwstorm na Hulanda

Sneeuwstorm na Hulanda. Click e link pa mas http://24ora.news/3tDe7hA

Posted by 24ora on Sunday, February 7, 2021

Awe diadomingo Hulanda a lanta sin servicio di transporte publico. Metro, tram y busnan no por a core, ya cu na cierto areanan tabatin 30cm di ijs cu ta causa cu vehiculonan ta slip. Tecniconan a traha duro pa reestablece e servicionan di transporte publico. Pa loke ta trein, prome cu merdia, no tabatin transporte, cual tabata un problema pa ciudadanonan. 

Hulanda no ta un pais conoci pa hay’e confronta cu tormenta di sneeuw. E ultimo biaha tabata na januari 2010, pues mas di 10 aña pasa. Y prome cu esey tabata mas of menos 25 aña prome cu a haya un tormenta asina. Ta bon pa bisa cu e record di e tormenta di sneeuw mas pisa di Hulanda tabata dia 14 di februari, riba Valentine’s Day, pero na aña 1979. E tempo ey a midi seronan di sneeuw cu tabata midi riba 6 meter di haltura.  

Tur cos ta mustra cu awe diadomingo lo sigui haya hopi sneeuw, compaña pa bastante biento fuerte. E temperatura tambe ta bahando pero ta sinti manera -15 grado Celcius. Por spera mas caida di sneeuw den e dianan aki, pero cu menos biento.