Toque De Queda tabata algo nobo pa mayoria Polis

984

Diaranson pa 5’or di marduga, e medida di Toque de Queda, implementa na Aruba despues di mas o menos 43 aña, a yega na su fin. Na tur e Toque de Queda a keda na vigor durante 67 dia y a detene 683 sospechoso. E prome dia tabata 21 di maart y e ultimo dia tabata 27 di mei.

Liliana Rasmijn di e departamento di Comunicacion, Informacion y Prevencion di Cuerpo Policial Aruba (KPA), a repasa e dos lunanan di control estricto riba caminda publico. Pa mayoria Polis, esaki ta algo nobo, pasobra nan no ta bib’e como Polis na aña 1977, ora cu tabatin di dos Toque De Queda den historia di Aruba. “Berdad e tabata algo nobo pa mayoria di nos, ami mes no ta corde.  Pero kico cu bin Polis mester ta cla pa atende pasobra nos tarea ta orden publico,” Rasmijn a cuminsa pa splica.

Como cu e tabata e prome biaha pa gran parti di e miembronan, loke a hunga un rol importante den ehecucion di e TDQ tabata un bon comunicacion tanto cu miembronan di KPA como e comunidad. Un seccion special den KPA tabata informa tur e miembronan di e desaroyo y cambionan prome cu nan subi caya. 

Den e periodo aki e Polisnan a topa cu problemanan cu ya caba nan ta atende normalmente, pero loke si a constata ta un aumento den discusionnan entre parehanan, door di perdida di trabou, cu ta trece stress den cas. “Pero mayoria tabata problemanan menor,” Liliana Rasmijn a enfatisa. 

Pa loke ta e prome dia normal bek, KPA a constata cu esaki a bay relativamente keto, compara cu ora cu TDQ a cuminsa. E tabata practicamente mescos cu e ultimo dianan ora cu no tabatin detencion mes. E hendenan  a custumbra caba cu e situacion.

E record di detencion tabata riba e di dos di dia di e medida ora cu a detene 45 persona. Hopi di e casonan, segun Rasmijn, tabata debi cu a tarda pa e hendenan compronde. E hendenan mester a custumbra cu nan no tabata permiti pa ta riba caya. Asina tin hopi persona cu no ta wak noticia y tin otronan cu tabata kier a reta e situacion, di trata yega cas prome cu Polis gara nan. Pero ora cu a cuminsa cu un comunicacion intensivo cu pueblo, e detencionnan a cuminsa baha. “Nos mester a simplemente haci nos trabou y percura cu e hendenan lo no ta riba caya,” el a bisa. 

Na final Rasmijn a recorda cu awo nan ta lo sigui cu nan trabou di controla y cumplimento di leynan manera cu chauffeurnan ta mantene nan mes na entre otro velocidad, uzo di faha di siguridad y cu tur documentonan ta na ordo.

Toque De Queda tabata algo nobo pa mayoria Polis

Toque De Queda tabata algo nobo pa mayoria Polis

Posted by 24ora on Friday, May 29, 2020