TOPA y SEPPA ta sinta na mesa cu gobierno pa soluciona e problema di Imigracion

Tin un mal contento, tin un tension na Imigracion na aeropuerto. Pero e bon noticia ta, cu sindicato TOPA y SEPPA, hunto, ta na mesa cu gobierno pa asina evita cualkier protesta of welga na Imigracion y wak si na mes por yega na solucion riba e mal contento cu ta existiendo. Y esey ta e miho forma tambe.

Presidente di TOPA, Rene Bernabela a splica cu recientemente sindicato TOPA y SEPPA tabata den reunion cu minister Bikker pa por discuti riba locual ta e mal contento cu tin bao di e personal di Imigracion. Ta asina cu den medionan di comunicacion, un sindicato a sali den fin di siman ultimo, caminda cu a duna di conoce cu lo a bay tin welga na Imigracion. TOPA, como un di e sindicatonan cu ta na mesa cu minister Bikker, ta desmenti esaki categoricamente.

 

Pakico

Si bo ta na mesa cu gobierno, no por ta posibel cu bo ta bay declara un welga, siendo cu bo ta na mesa na e momento aki, ta discuti y trata di yega na un solucion. Pesey a bisa te na e momentonan aki, trahadonan tur na Imigracion ta riba un standby y ta informando nan alabes, na momento cu sali for di reunion cu Minister Bikker, kico ta e situacion. Tur hende na Aruba sa, ta un problema tin. E un problema cu tin na e momentonan aki, cu tin tension bao di e trahadonan di Imigracion, ta management team cu ta haciendo su trabao na un forma no adecua.
Trahadonan a dicidi cu nan no kier sigui traha cu e management team. Pesey ta sinta na mesa cu minister Bikker pa yega na un solucion pa loke ta management team. No por ta asina caminda cu bo ta lanta mainta, bo ta bin traha y ora cu bo ta bin traha, na pia di trabao, bo ta wordo gekauw, bo ta wordo mal papia, bo ta wordo raspa, sin tin motibo. Ningun hende na Aruba ta lanta bin for di nan cas pa bin wordo maltrata na pia di trabao. Pesey a atende cu minister riba e comportacion di un di e miembronan di e management team aki. Si minister Bikker no atende e asunto serio aki, e ora ey no ta descarta cu lo por tin cu stepup riba e procedura di loke ta tumando luga, Benabela a menciona.

Ken e ta

Ta papiando aki di Trudy Hassel y Icho Matos, kendenan cu ta forma parti di e management team. Si wak bon, ta un persona so ta tuma tur decision pa loke ta concerni e management team, cual ta Hassel. E manera cu Hassel, segun coleganan di Bernabela na Imigracion ta informa, e manera con e ta trata nan, e manera con ta anda cu nan, como parti di management team, no ta manera con ta papia y trata hende. Tur hende ta ser humano. Na trabao tur trahado merece di haya e respet necesario y tambe pa dun’e respet bek.
Na momento cu bo ta bin halsa, papia na un manera onbeschoft cu trahadonan, ningun trahado na Aruba, specialmente, como empleado publico, no lo bay acepta esaki. Mucho menos empleadonan di Imigracion.

A purba acercamento

A sinta hopi biaha cu Trudy Hassel pa loke ta e formatierapport cu ta bezig cun’e. E ta bay haci casi un aña, cu ta trahando riba e formatierapport, pa loke ta reorganisacion di Imigracion. Ainda esaki no por keda cla. E management team aki, dentro di poco ta bay existi casi un aña y nan no tin nada poni riba papel, den ki forma nan kier bay reorganisa e departamento. Si locual Hassel ta bin cun’e, ta su ponencianan riba papel. E kier pa tur hende cumpli cu esaki. Hasta sindicatonan. A cuestiona, desde cuando un persona cu ta forma parti di un management team, ta bin duna instruccion na sindicato, den ki direccion sindicato mester bay pa loke ta formatierapport.
TOPA ta dispuesto pa sinta na mesa pa dialoga. Pero sindicatonan no ta traha bao di presion. Na e momentonan aki e parti di management team, esta Hassel, kier pone sindicatonan bao di presion pa loke ta cuestion di formatierapport y sindicatonan no lo bay acepta esaki. Kier pa tin un paz y trankilidad na e departamento di imigracion. Ya cu ta papiando di reorganisa e departamento, e mester bay di un forma structura, respeta na ambos banda. Pero siguramente, e no mester ta den un forma asina caminda cu ta bin pone presion riba sindicatonan, caminda cu e ta bisa “It’s my way, or the highway”.
Sindicatonan no lo acepta ponencia di Hassel di loke ta e formatierapport. Pesey ta na mesa cu minister Bikker, pasobra na final di dia Minister Bikker ta keda esun responsabel pa e maneho di e departamento di imigracion.