Tjon no tin comentario ainda riba retiro di Ras

7

Lider di Fraccion di MEP den Parlamento, Rocco Tjon, awe a nenga di contesta preguntanan di prensa relaciona cu e retiro di Sue-Ann Ras for di Parlamento. El a bisa cu awetardi 5:00pm tin un reunion interno di partido y cu ta despues di esey lo por duna declaracion of opinion.

Mester bisa cu di otro banda Presidente di Parlamento, mr. Ady Thijsen, si a sali duna su opinion alrespecto y a culpa Prensa na Hulanda di a graba e Parlamentario sin su permiso. E hecho cu e ta mira pelicula durante un reunion den Eerste Kamer e no ta aproba, pero tampoco e ta aproba e hecho cu prensa ta abusa di nan libertad pa graba pantaya di computer di un Parlamentario. E ta haya cu esey ta un poco mucho leu y inaceptabel.

Rocco Tjon a haya preguntanan for di prensa despues di un conferencia di prensa riba e reunionnan di IPKO na Hulanda. Obviamente e no tabata prepara pa e retiro repentino di su colega y no tabata sa kico pa bisa of no tabata prepara of no tabatin instruccion di liderazgo di partido riba locual e por divulga of no. Contrario na e contesta di Tjon, mayoria otro Minister, incluyendo Prome Minister y Lider di MEP si tabatin un opinion riba red social relaciona cu e retiro.

MEP no tin reaccion ainda riba retiro di Sue-Ann Ras

MEP no tin reaccion ainda riba retiro di Sue-Ann Ras. Click e link pa mas https://24ora.news/2YG55kg

Posted by 24ora on Monday, July 8, 2019

Sue-Ann Ras a cumpli algo mas di 1 aña como Parlamentario di MEP pero a entrega retiro awe despues cu a gar’e ta mira un pelicula riba Netflix den pleno reunion di Parlamento na Hulanda. El a bisti su “earphones” pa sinta den tur trankilidad mira pelicula mientras profesornan tabata splica riba leynan importante cu ta rigi e “geschillenregeling” den Reino Hulandes. E actitud aki tabata di sea e no ta compronde e materia of no ta interesa den e materia.

Mayoria politico di Partido MEP a lamenta su decision pero a aplaudi su postura debi cu el a acepta su eror y ta asumi responsabilidad. Partido AVP ni POR ainda no a bisa nada. Pero coleganan di coalicion, esta RED a bisa di diasabra caba cu Ras ta “gaña baca” ora el a bisa cu e tabata mira pelicula pasobra no kier a scucha e discurso di Ricardo Croes den Eerste Kamer. Croes a reta Ras pa e tuma su retiro pasobra e no ta sirbi, no ta digno y no ta integro pa e stoel di un Parlamentario.