Tjon na Knops: A bira tempo pa dialoga sin menasa

Manera ta conoci tin negosacionnan andando entre Hulanda y Aruba pa loke ta e sosten di likidez. Esaki apesar cu e colegio di supervicion financiero a conseha Hulanda pa duna Aruba e fiansa. Sinembargo e lider di fraccion di MEP den Parlamento, Rocco Tjon, ta notando cu algun fraccion den Parlamento Hulandes (Tweede Kamer) a cuminsa cuestiona e leynan di consenso y hasta e condicionnan cu Gobierno di Hulanda kier impone riba nos isla.

E conseho di CAFT por lesa bek den nan carta di 24 juni 2020 (CFT202000079) den cual literalmente nan ta bisa: “Het CAFT adviseert de RMR over te gaan tot het toekennen van AWG 204 miljoen liquiditeitssteun voor het derde kwartaal”.

Siman pasa diabierna fraccion di MEP a dirigi un carta na tur e lidernan di fraccion di 2e kamer. Den e carta aki nos a pidi atencion pa e desaroyo actual y na mes momento mustranan riba e hecho cu ya caba tawata tin un conseho positivo pa Aruba haya e fianza necesario. Tambe nos a trece pa dilanti cu tin otro alternativanan riba mesa pa yega na e mesun resultado.

“Nos a keda satisfecho di por a tuma nota cu, despues cu e secretario di Estado siman pasa a contesta 2e kamer, awe sinembargo tin un serie di 15 pregunta haci door di D66 y PVDA cuestionando e Secretario di Estado. Entre otro nan ta haci pregunta riba e punto cu e ombudsmannen a trece padilanti caminda ta señala cu e condicionnan impone por traha negativamente riba e economianan di e islanan y tin consecuencia social grandi. Tambe nan ta cuestiona e legitimidad di e leynan, e hecho cu e ta mina e budgetrecht di e Parlamentonan y nan ta cuestiona e autoridad cu e entidad aki lo haya. Tur e preguntanan por lesanan riba e website di 2e kamer”, asina Rocco Tjon a informa awe.

“Mi ta kere cu ora tur e diferente organonan consultativo (raad van advies) di e paisnan Caribense, diferente profesor Hulandes renombra, Parlamentonan di e islanan Caribense y e Gobiernonan di e paisnan Caribense tur trece pa dilanti cu e proceso cu e secretario di estado Raymond Knops kier encamina no ta corecto y e condicionnan ta desproporcional, a bira tempo p’e reflexiona y dialoga abierto, sin menasa, pa yega na un solucion realistico”, asina e Parlamentario di Aruba a termina bisando.