CEO di Aruba Hotel & Tourism Association, Tisa LaSorte a atende 2 reunion e siman aki pa clarifica e recomendacionnan pa regulacion di e uzo di ATV y UTV na Aruba.
Desde Januari 2019, AHATA a manda un carta pa gobierno, cu un recomendacion di regulacion pa trece disciplina den e sector y pa crea mas proteccion pa hende y pa nos naturalesa.
E prome reunion a tuma luga na Bestuurskantoor cu Minister di Husticia, Minister di Infrastructura y Medio Ambiente, y Minister di Transporte. Durante e reunion AHATA a reitera su posicion cu regulacion y proteccion di nos naturalesa ta di gran importancia pa nos pais.
Minister di Infrastructura y Medio Ambiente a clarifica cu a caba di introduci 16 area nobo como area protegi di naturalesa den Aruba su ROPV nobo. Trafico motoriza lo ta prohibi den e areanan aki.
Minister di Husticia a clarifica cu gobierno di Aruba no tin intencion di prohibi e uzo di vehiculonan ATV y UTV na Aruba y Minister di Transporte a clarifica cu ta trahando riba regulacion, pero cu e proyecto ta toca varios Ministerio y ta rekeri coordinacion.
Tur participante den e reunion tabata di acuerdo cu mester bin regulacion y cu ta importante pa e vehiculonan pasa keuring. A subraya tambe cu mester sigura cu tin implementacion di regla pa tur compania por tin mesun restriccion y oportunidad.
E di dos reunion di AHATA tabata cu Parke Nacional Arikok (PNA) tocante nan maneho nobo. Durante e reunion cu PNA, AHATA a pidi pa clarificacion di e diferencia entre SUV (jeep), UTV y ATV den nan maneho nobo, pasobra a anuncia cu SUV (jeep) no lo ta prohibi despues di 31 di October. A prohibi ATV desde 1 di Juni y UTV desde 31 di October.
Den un siguiente reunion lo bay den mas detaye riba e pregunta aki. A combersa tambe riba e meta pa inspira actividad nobo den Parke Nacional Arikok cu ta mas sostenibel y duradero y cu lo tin menos impacto riba naturalesa.
AHATA lo sigui coopera cu PNA pa yega na recreacion responsabel den e parke nacional. Mientrastanto, lo sigui busca mas claridad tambe pa e companianan afecta pa e maneho nobo.
