Diasabra atardi Polisnan a bay cu urgencia den direccion di Macuarima. Na prome istante a papia di pelea cu machete. Na caminda e Polisnan a wordo pidi pa bay mas pura pasobra tin hende cu a wordo corta cu machete. Un hende a yega warda di Polis na Santa Cruz bou grito. Polisnan di Santa Cruz y di Trafico a presenta y haya nan mes den e cayente. A mira cu tabata tin sospechoso ta core bay for di e sitio.
Mesora a los tiro di advertencia. Asina a logra aresta dos di e sospechosonan. Un di nan tabata basta agresivo y tambe herida. A pidi presencia di ambulance. Ora Paramediconan a bay atende cune e tabata sigui agresivo. Kier a transporte bou vigilancia Policial. Mirando e agresividad, e Paramediconan a bisa Polis cu nan no ta bay cune. Ambos sospechoso a wordo hiba den Dog Catcher pa warda. Na e sitio a cuminsa investigacion pa mira kiko a sosode.
E sospechosonan lo a drenta cas di hende tambe y causa destruccion. E tabata un momento di tension den Santa Cruz. Hendenan eybanda a spanta ora a scucha tiro y a yama Polis pa e tironan cu nan a scucha. A resulta cu ta tironan cu a sali for di e arma di Polis mes. Recherche a tuma e investigacion over.
