Diadomingo marduga a cuminsa un persecucion formal na altura di Wema Ponton. Ta na momento cu un vehiculo cu dos persona aden a dicidi di reta polis y sigui core en bes di para pa atende cu nan.
For di Wema Ponton e chauffeur di un auto marca Honda color shinishi, numera A-30962 a tuma direccion EPB Hato pa despues busca manera pa subi Watty Vos Blvrd te cu paperclip rotonde caminda el a baha y tuma direccion Sero Blanco. Estilo pelicula, a draai, drift den e parkinglot di Apfa pero sin intencion di para.
Unidad di diferente districto a bin duna man y purba para e vehiculo aki pero esaki no tabata tin ningun intencion di para. E persecucion a continua ora e auto a sali band’i pariba di Apfa direccion paperclip rotonde atrobe for di unda el a sigui pa Paradera. El a opta pa drenta Sero Patrishi pasa banda di Glen’s Place y bolbe sali pa subi Watty Vos Boulevard.
Despues el a dicidi di tuma e biaha aki caminda di santo pero sali bek paperclip rotonde caminda despues a tuma direccion rotonde Paradera unda el desvia pa Rooi Afo. Un rato despues a sali banda di Best Deal Paradera subi caminda bek y termina dilanti Great Rich Restaurant caminda cu tiro di advertencia a cay.
Despues di hopi esfuerso a logra para e vehiculo y detene e dos personanan aki. A compronde cu tambe a haya droga y arma den nan posesion. E vehiculo a keda cu bastante daño material pa cual mester a transport’e cu takelwagen for di sitio. No ta conoci motibo dicon a opta pa huy en bes di para pa polis pero esaki no a resulta e miho opcion pa e dos personanan aki e anochi aki.
