Rocco Franken, director di Tipico Buleria, a conta cu tur detaye di nan canticanan, den categoria adulto di e festival cultural, ta cla for di aña pasa. Simplemente un siman atras a cuminsa cu nan training pa duna e ultimo tokenan na nan participacion.
Rocco ta corda hopi bon con el a yega na su cancion aña pasa. E tabata riba ultimo dia di inscripcion cu el a haya e peticion pa e canta hunto cu Jair (Buddy) Versprey, e composicion di Lorena Schwengle. “Mi no a pensa dos biaha pasobra e tabata un compositora conoci cu mi tabata kier a traha cu ne caba. E lo tabata algo unico, pasobra nos ta un duo di dos cabayero cantando e cancion aki.”
Buleria ta conoci den otro genero musical, pero pa e festival aki a haci uzo di algun instrumento cu ta duna e toke na e cancionnan tipico. Pero e constelacion di e grupo ta mescos. “esaki, el a bisa, ta un regalo pa e pueblo di Aruba. Un banda local cu ta toca cancionnan tipico tambe y duna su aporte na e cultura di Aruba.
Presentacion virtual nan a yega di hacie caba, pero e ta keda algo diferente pasobra, e ta bisa, no tin e publico direct cu ta mustra apoyo por medio di aplauso of grito. A pesar di esaki, nan tur ta sinti un entusiasmo grandi di por participa den e festival virtual di diasabra anochi.
Diasabra e festival ta cuminsa pa 5’or di atardi via di canal 22 of via e Facebook page di Un Canto pa Aruba su Himno y Bandera.