Hende a bisa cu mester tanto permiso pa bira Hulandes. Aunke tin cierto reglanan pisa pa esaki. E ley mes cu ta reglamenta e parti di haya nacionalidad, ta un ley na nivel di reino.
Eyden tin tur posibel opcionnan cu por scoge di dje, sea cu ta optie voor naturalisatie. Cada un tin su reglanan cu ta mara na dje. Esaki tur ta cay bao di gabinete di gobernador y IND, segun Kathy Ruiz-Paskel, directora di DIMAS.
Den e trayecto ey, tanto IND como gabinete di gobernador lo por puntra DIMAS den ocasion pa un cosneho pa loke ta parti di historia tabata pa e persona cu ta solicitando pa bira Hulandes. Den esaki ta bay wak si tin buraconan den estadia. Pero tambe ta wak e tipo di verblijfsdoel cu e hende tabata tin. Tin cierto categorianan di permiso cu ta dunabo berdad derecho di estadia na Aruba, pero den un proceso di naturalisacion, e no lo ta valido, pasobra e ta wordo considera como permisonan duna den cuadro di algo cu no ta indefinitivo. Por ehempel un hende cu ta bin pa studia, ta haya un studievergunning. E cantidad di studievergunningnan aki cu acumula, no lo conta despues den un proceso si e dicidi un dia di kier aplica pa Hulandes.
Mesun cos bo tin otro tipo di permisonan cu ta considera di tempo corto y tin e particularidad den e caso aki, cu bo tin e permiso pa labor, cu door cu ainda ta den ley e modelo Swiso, no a aboli’e formalmente cu pa tanto Gabinete como IND ta conta cu ta conta esaki como permanente. Solamente si tin mas cu tres permiso den man. Si ta menos cu esey, no lo conta y si tin mas cu esey lo conta 1,2,3,4 y e siguientenan.
E ta poco tecnico, pero si en berdad algo pa para keto na dje, pasobra e estadia na Aruba por forma un base pa cual e persona den futuro por aplica pa nacionalidad Hulandes.
Pa e parti di naturalisacion, DIMAS mes por a ripara cu e cantidad a baha drasticamente desde 2011. Desde e tempo aki, na nivel di reino a cambia e ley cu esnan cu ta pidi naturalisacion, no solamente mester por domina e idioma Papiamento, pero tambe Hulandes. Esey tanto skirbi, papia, etc. Esaki a haci cu e prome generacion ta hopi mas dificil pa adkiri e nacionalidad Hulandes. Pa un di dos generacion, cual ta yiunan di e personanan aki no lo ta problema mas, pasobra cu nan lo a acudi na scol y a base di e scol mes nan lo tin cierto exoneracionnan.
E ta den ley. tin hende ta aplica mas tanto pa opcion cu ta bay te un 15 aña bek unda cu lo mester revisa den tur e periodo ey continuamente a pidi bo permiso na ora, esta cu no a acumula buraconan cu cada biaha cu e periodo tin cu bay cuminsa conta di nobo. A keda accentua na tur hende cu ta depende di un permiso pa haci e tramite pa un permiso na ora. Pa bo semper cumpli cu ley pero tambe pa evita cu si den un futuro ta interesa di aplica pa nacionalidad Hulandes, pa esaki lo por ta bisa cu no a cumpli pasobra tabata tin buraco den estadia.
