Den e dianan aki a tende cierto noticianan sumamente negativo rond di e refineria cu noticianan cu prome minister ta bao di investigacion, cu su colega ta bao di investigacion. Tur proyecto ta on hold na Citgo. Prome Minister, Mike Eman, a splica cu den temporada di campaña por spera tur tipo di noticia fabrica. Pa Gobierno ta importante pa keda focus riba locual ta berdad y tambe locual ta importante pa futuro di pais Aruba. Prensa a investiga y a mustra cu e noticianan ta fabrica. Locual ta importante ta cu aparentemente personanan toch ta sinti e necesidad pa traha noticianan asina. Esey ta nifica cu posiblemente, electoralmente ta sinti e impacto cu un biaha mas tur locual cu Gobierno a haci, ta bay tin den e eleccion aki. Reapertura di e refineria sigur ta hunga un rol hopi importante den e eleccion aki, pasobra biaha pasa, a bay eleccion cu un refineria cera y AVP a haya 13 asiento. Ta bay eleccion e biaha aki den pleno proceso di reapertura, inversionnan gigantesco ta wordo haci. Companianan cu durante eleccion pasa, no tabata traha, hopi persona cu por tabata den eleccion pasa, no tabata traha, awe ta na pia di trabao, trahando y otronan ta bay hayando trabao den e siman y lunanan cu ta bin aki, pa motibo di e gran labor cu a wordo haci, specialmente den e caso aki di minister Mike de Meza. Ta compronde cu esey ta lanta cierto inkietud cerca oponentenan politico. Si algo ta lanta un preocupacion electoral, purba di haci’e toch na un manera mas digno y mas na nivel cu crea noticianan fabrica. Ta parti di e proceso electoral. A pasa hopi eleccion y conoce e cosnan aki y nos comunidad tambe conoce e tipo di publicacionnan asina. Ta importante cu comunidad ta reaccionanan mas y mas decisivo cu tur loke Gobierno a haci ta asina visibel, nan por mir’e, nan por mir’e den nan cas, den nan bario, nan por mir’e hopi bes den cambio di condicionnan cu tabata conta pa nan. Si nan tabata riba un bijstand, esaki a aumenta. Si nan ta riba pensioen, esaki a wordo ahusta. Si nan tabata tin un salario minimo, nan ta mira cu nan tin un reparatie toeslag. Si nan tabata tin cuentanan halto di awa y coriente, nan ta mira cu e cuentanan a reduci. Si canchanan deportivo tabata den deterioro, awendia hopi ta wordo drecha. Otronan ta haya facilidadnan nobo, veldnan chikito di yerba, batting cage, hopi special y sofistica. Prijs di facilidadnan deportivo tambe a wordo reduci cu 50% pa iluminacion. Cada faceta di desaroyo di Aruba, di hospital nobo, containerhaven, centro di ciudad, bario, scolnan, aumento di pensioen, reapertura di refineria. E trabao di e Gobierno aki ta asina grandi, asina evidente, historico, cu por compronde e preocupacion cu tin cerca oponentenan politico. Esey no ta distrai e atencion cu pueblo tin pa e exito y mas ainda pa e trabao cu tin cu continua, pasobra ta mira tambe for di e mesun critica cu tin, cu oposicion no tin ningun vision, ningun pensamento riba con pa hiba Aruba den e siguiente etapa di progreso cu ta bin, atrobe for di e partido aki. E rehubenicimento cu partido AVP a introduci den e ultimo simannan aki tambe, ta lanta un inkietud grandi cerca opositornan. Pasobra talento tras di talento nobo, no a uni cu partido den oposicion cu lo a spera despues di ocho aña den oposicion, lo a haya caranan nobo cu realmente lo a destaca y inspira, of bo ta un partido nobo cu lo a haya e personalidadnan aki. Ta hustamente partido AVP atrobe, liderando atrobe tambe den innovacion, den rehubenece politica di Aruba. Esey ta haci cu e trabao y stabilidad cu e partido cu e ta representa y e exito cu e partido ta representa, hunto cu e talentonan nobo aki, ta haci cu e partido aki, un biaha mas ta bay pa un resultado record den historia politico di Aruba y ta mir’e tur skina di Aruba cu ta canando, segun prome minister.
