Tin hopi interes pa opera refineria y terminal na Aruba

Mirando e situacion di Aruba y di Gobierno, no por drumi mucho riba oportunidadnan, prome minister Evelyn Wever-Croes a bisa den un reunion extraordinario. Pa e motibo aki nan ta bay over pa un siguiente fase, cual ta busca interesadonan pa opera e refineria y esey nan ta cuminsa mesora riba dje.

E mandatario a splica cu tin un lista di 25 interesado cu a haya cierto corespondencia di Gobierno caba. Awor aki gobierno ta mas liber pa bay den negociacion cu nan.
Esaki Gobierno ta bay haci despues di un negociacion largo cu Citgo pa entrega e refineria y terminal bek na Aruba. Un palabracion cu ta bay hinca den un MoU cu mester firma ainda.
Manera cu a yega di splica, si un interesado manda un carta, gobierno ta contesta bek, pidiendo mas informacionnan adicional, pero for di ey no por a sigui pasobra e ora ta viola e contracto cu tin cu CITGO.

E MoU ta permiti gobierno sigui papia cu un interesado pa mira con serio e ta y bay cu otro hendenan tambe. Pero esaki mester tuma luga hopi lihe, segun e prome minister.

Exigencianan
Gobierno tin su exigencianan pa e operador nobo, unda bes cu scoge esaki. E exigencianan general cu tin, ta buscando un compania cu ta serio, cu ta renombra riba e tereno aki. Ta busca un compania cu tin su fondonan. Un compania cu si tin cu bay procesa crudo, e tin manera pa haya crudo of e mes tin e crudo.
A siña cu si bo no tin bo mesun crudo, Aruba no ta un alternativa bon, of solamente pa un tempo. Ta buscando un partner cu ta bay mehora e facilidadnan. Gobierno no kier un refineria sushi. No kier un refineria cu no ta cumpli cu standardnan medioambiental. Esaki ta un fase mas moderno, un fase cu gobierno tambe ta cumpli cu regla. Gobierno mes kier atene nan mes na e reglanan y e compania tambe mes mester cumpli. Gobierno ta buscando un partner cu kier cambia e refineria haci’e un state of the art, cu ta trata su trahadonan bon y tambe cu por paga su fair share na gobierno. Y no un cu ta bisa cu e ta bin haci’e y gobierno no ta haya su parti.


A haya den esnan cu a duna nan expresion di interes, cu ta interesa pa cumpra full e instalacionnan. Tin otro cu a bisa cu kier skrap tur instalacion bieu pa bin cu algo totalmente nobo cu ta produci productonan final di calidad. Aworaki ta producto intermediario. A haya un expresion di interes tambe di grupo cu kier uza e tereno pa traha un storage terminal pa LNG, pa distribui den e region. Tin tambe cu a bisa cu nan ta interesa pa nan mes trece crudo pa refineria. Tin otro cu ta bisa cu kier drecha e refineria y e terminal. Pero tin algun tambe cu a pidi garantia y gobierno no ta bay duna garantia, cual ta un otro exigencia. Gobierno no ta bay den e aventura di garantia. Tin cu nan mes no kier opera, pero si financia e remodelacion. Asina tin cantidad di interes caba expresa. Gobierno ta bay wak kico ta e miho pa Aruba.

Interes
Tin hopi interes, segun prome minister. Tabata tin tambe cu a bisa cu loke nan kier ta pa nan haci e inversionnan, upgrade loke tin y produci productonan final. Aworaki ta produci productonan intermedio pa despues bay un otro caminda pa procesa. Si ta un producto final, ta cumbini Aruba hopi mas. Tin varios opcion,e prome mandatario a comenta. Gobierno ta bay ta habri pa tur opcion, pero loke si ta bisto, Gobierno ta prefera pa Citgo bay cu Citgo keda.

Prospectonan
Den esnan cu gobierno ta bay papia cu nan, no ta depende di e modelo Venezuela, segun prome minister. Esaki ta hendenan cu los di e modelo Venezuela, los di crudo di Venezuela, ta mira cu Aruba ta un potencial. Awo gobierno ta bay cuminsa cu e trabao. Hopi biaha hende por skirbi carta nechi, pero awo cu ta bay sinta, ta bay wak kico e hendenan aki tin aden.