E aspecto di reunificacion familiar, tin diferente regla aplicabel na DIMAS. Segun directora Kathy Ruiz-Paskel, riba e parti aki, por lo general e regla ta cu e prome tres añanan un ciudadano cu ta rekeri di permiso no por pidi pa reunificacion familiar.
Tin den e maneho stipula tambe cual ta e exoneracionnan cu tin a base di e regla aki. Locual cu tin tambe ta cu ta haya diferente peticion pa despues cu por ehempel un matrimonio cu un persona local termina y for di e matrimonio a resulta cu tin cierto yiunan a nace, cu a base di e yiunan aki, ta pidi pa continua cu un estadia legal na Aruba.
Esaki tambe tin su reglanan pa cumpli cun’e. Pa ta consiso riba e parti aki, ta yam’e “bijzondere band met Aruba”, cual ta aplicabel si e yiu a nace for di matrimonio cu un persona cu no ta rekeri di permiso, sea pasobra LTU no ta aplicabel p’e of e tin admision segun ley. Ademas, e yiu a nace na Aruba, e tin nacionalidad Hulandes y e persona cu tin e permiso tin custodia riba e yiu, y/of ta dunando alimentacion, e ora eynan e lo por aplica pa un permiso, asina cu yam’e bijzindere band.
Importante tambe ta cu den cuadro di cambio di maneho, desde 1 di november 2018 e persona aki lo mester acudi na e departamento di DPL p’asina aya nan determina si e lo mester pasa un screening laboral of si e lo haya un exoneracion di esaki. E ta bin cu su documentonan di DPL y siguientemente e lo por haci un aplicacion na DIMAS pa e tipo di permiso aki.
E idea tras di e maneho ta, cu e persona cu a forma un famia originalmente na Aruba y for di e relacion ey tin yiu naci na Aruba, e personanan ey por aplica despues cu e union matrimonial aki caba pa un titulo di estadia pa por provee den mantencion di e yiu cu e tin na su encargo.
Pero e tambe tin cu pasa un toetsing riba mercado laboral (DPL) pa wak si esaki ta necesario. Esey ta un cambio cu tabata tin na november 2018. E otro posibilidadnan cu ta haya cu for di un matrimonio no a nace yiu. Si e matrimonio ey cu e persona Hulandes, naci na Aruba, no tin yiu no a nace fo’i dje y e relacion no a dura cinco aña, e persona mester bandona Aruba despues cu e relacion termina of pidi un cambio. Den caso cu el a dura mas cu cinco aña e por pidi tambe un “bijzondere band”. E ora e lo tin cu aplica tambe na DPL, pasa un screening laboral of si e mester, e por haya un exoneracion den esaki.
Esaki ta wordo stipula pa DPL y e minister concerni. Un otro categoria cu tambe ta haya di “bijzondere band” ta por ehempel esnan cu un tempo tabata Arubiano, esta Hulades naci na Aruba, a bay Merca y aya nan a banderea. Door di banderea nan a perde nan nacionalidad. Tipo di casonan ey ta haya cu nan ta bin bek y kier biba na Aruba.
Na e momento cu nan bin bek, e ta un persona stranhero di nacionalidad Mericano. Pa e prome aña, en todo caso, ta rekeri di permiso prome cu nan aplica pa opcion via di gabinete di gobernador. Ta algun ehempel di bijzondere band cu Aruba.
Otro caso cu DIMAS sa haya tambe ta cu no tabata tin un relacion, pero si tin un yiu Hulandes naci na Aruba. E mesun reglanan ta aplicabel. Si por mustra cu tin custodia di e yiu, cu e mucha ta Hulandes menor naci na Aruba y e mayor eynan lo por aplica pa haya un titulo di estadia, e tambe mester cumpli cu e rekisito cu ta stipula den ley y maneho. E lo mester acudi na DPL y eynan lo determina si mester pasa un toetsing laboral si of no.
Den caso cu ta trata di un famia, esta mama, tata stranhero y nan tin yiunan naci na Aruba, ta bon pa remarca cu e yiunan naci na Aruba no ta automaticamente Hulandes.
Si por ehempel ta Venezolano y Colombiano y e yiu a nace na Aruba, e yiu ta adkiri e nacionalidad di e mayor. E mayor tin cu percura cu banda di su estadia legal ta na ordo y esun di e yiu tambe ta na ordo. Si e yiu ta naci na Aruba, por aplica pa unificacion familiar. Claro e tin cu bay cumpli pa mustra cierto rekisitonan.
Un rekisito cu por ta bon pa remarca ora di reunificacion familiar, ta e parti cu desde dia 1 di november 2018, tin un asina yama inkomensvereisten. Y e casa cu ta pidi pa e yiunan, tin cu mustra cu e tin suficiente entrada pa e por sostene e famia.
Si e no por mustra esaki e no lo bin na remarca pa e permiso ey y e ora esey no ta nifica cu e casa no lo por haya un permiso, pero lo tin cu aplica pa otro procesonan. Eynan e lo tin cu cumpli cu e reglanan tambe pa por bin na remarca pa esey. E gran mayoria cu DIMAS ta haya ta arbeid in loondienst.
