Tin como seis denuncia caba contra Leoncio Corona pa estafa

Ta wardando pa e decision di Ministerio Publico pa asina mira si lo detene y persigui Leoncio Corona cu e estafanan cometi. Ta hopi victima tin y varios a sali dilanti pa papia.

Leoncio Corona cu ta yama radio alaba minister Otmar Oduber tur dia, a usa nbomber y voicenote di Otmar Oduber pa asina estafa hopi hende. El a prueba cu e tin e contacto cu e minister y cu e minister tabata intermediario di algun peticion cu Leoncio Corona mes a haci na su minister preferi.

Mester bay demostra e rol di e minister di e estafanan aki. Awor ya caba e contacto entre Leoncio Corona y e mandatario no tey mas. E mandatario a kibra e relacion cu Corona. Awor Corona na radio ta rogando e minister pa no kere e denunciantenan pasobra ta plan pa caba cu gobierno.

Un storia increible pa purba contradeci tur e victimanan. Na Aruba den weekend un choler a bay horta un paki chuculati y Polis a bin mesora pa asina detene. E ladron di e paki di chuculati a logra huy. Den e caso di Leoncio Corona ta papia di estafanan di hopi miles di florin.

Tin un solo hende cu a ser estafa cu 21 mil florin, otronan mas cu 9 mil. Tin como seis denuncia caba haci contra Leoncio Corona. Asina mes cu tur e denuncianan haci desde April, te ainda e ta cana los.

Awor ta victimanan cu no ta mira husticia a cuminsa papia pubicamente y conta kico a pasa y kende a estafanan. Interesante pa sa e pocision cu Ministerio Publico lo bay tuma despues di tur e denuncianan haci. Hort un paki ham bo ta bay cera, pero estafa y horta miles di florin no tin husticia. Kizas e mihor castigo ta esun di sali publicamente denuncie den pueblo y evita mas victima.