Recientemente IDEA (Iniciativa pa Desaroyo pa Empresa Arubano) y Departamento di Impuesto (DIMP) a organisa e tayer “Time for Taxes”. E oradornan di (DIMP) tabata Valeska Milton-Genaro, Johrainne Giron-Lacle, Amadee Nicolaas y Arjan Kisjes.
Un total di 80 persona a participa den e workshop menciona. IDEA ta contento cu e acogida di e workshop y e bon comentarionan ricibi di su participantenan. Tur tayer di IDEA ta gratis y ta dedica na SME’s (Small & Medium Enterprises) y na tur cu kier cuminsa un negoshi y cu kier educa nan mes riba diferente topico comercial.
Topiconan cu a resalta y presenta durante e tayer tabata:
- Inkomstenbelasting;
- Winstbelasting;
- BBO/BAVP/BAZV;
- Loonbelasting y primanan social;
- Verzamelloonstaat;
- Verzamelstaat opgaaf derden;
Tambe a duna un splicacion di e tur e digitalisacion cu ta wordo introduci den fase cuminsamento di otro aña, manera: introduccion DIMP Mobile APP “Bo Impuesto”, website nobo, introduccion di online aangifte di BBO/BAZV; LB y sociale premies, introduccion online aangifte toeristenheffing, IB y WB.
Durante di e presentacion, Luenne Gomez-Pieters, Director di DIMP y Meverly Romano, vocero di DIMP, tambe tawata presente pa contesta preguntanan y pa informa participantenan di cambionan cu lo tuma luga otro aña. Na final di e presentacion, e participantenan a haya oportunidad pa traha riba un casus caminda nan por a practica e teoria cu nan a ricibi durante e presentacion.
Un workshop sigur hopi interactivo y un tremendo presentacion di parti di e team di Departamento di Impuesto. Un danki na tur participante y un danki special na e presentadornan di Departamento di Impuesto cu a comparti nan experticio cu tur esnan presente. Keda pendiente pa nos workshops y corda sigui nos riba pagina riba Facebook @Idea-Aruba.