Tilico Lares enfrentando 15 aña di prizon pa asesinato na Rooi Bosal

Dia 13 di juli proximo, mainta tempran, e acusado Igmar “Tilico” Lares lo haya sa si Corte ta bay di acuerdo cu e demanda di 15 aña cu Fiscal a pidi p’e, relaciona cu morto di Edward R. “Pons” Thiel. Un hecho cu a tuma luga diabierna dia 23 di februari ultimo na Rooi Bosal. E dia ey a yega cu e victima na Hospital cu herida di bala den pecho. Un rato despues Pons a fayece.Rapidamente a detene e sospechoso Igmar Lares. El a admiti di a tira e homber despues di problema, discusion, cu nan tabatin relaciona cu un bulletproofvest cu e victima tabatin bisti.

Kico a pasa?

Diabierna den Corte e storia straño aki un biaha mas a wordo conta. Tur cos a cuminsa rond di un bulletproofvest cu e acusado no tabata kier riba su tereno. Segun el a conta, e tabata drumi y a lanta banda di 9’or di anochi y a mira su amigonan pafo den cura. El a duna un di nan un lift y a bolbe pa baña. Na momento cu el a sali pafo, el a hala atencion di un di su amigonan cu tabatin un bulletproo0fvest bisti y a bis’e cu e no kier e cos ey na su cas.

Dado momento el a bay coy un arma den e matanan y a bay paden. E ta bisa cu el a pidi su casa pa yama 911 por si acaso surgi problema. Pero niun caminda e version aki ta aparece den e proces-verbaal. E ta bisa cu ora cu el a bin pafo atrobe, e discusion a sigui y e victima lo a dal’e.

Durante e interogacion Hues na diferente ocasion a puntr’e di con si e tabata paden caba, pakico el a bolbe pafo. Su contesta tabata pa mira si e grupo di amigo t’ey ainda. Pero atrobe Hues a bis’e esey no ta un motibo si e tabata sa cu nan ta bebi y e tabatin un arma den su poder. Ademas, e splicacion cu el a duna cu e victima a push’e of dal’e no a convence Hues ni Fiscal pasobra na momento cu el a bolbe pafo, el a los un tiro den laira y djey a los un tiro dirigi riba Pons na un distancia di 3 pa 4 meter for di dje. Pues nan no tabata para cerca di dje. Na e momento ey algun persona den sala, familiar y amistad di e victima, tabata sacudi cabes manera cu nan no tabata di acuerdo cu splicacion di e acusado.

E victima: Pons Thiel
E victima Edward R. “Pons” Thiel ta naci na Aruba dia 20 di november 1986 y como tal tin apenas 31 aña di edad. E tabata cu su ruman tambe na e cas na Rooi Bosal. Pons tabata biba na su mama hunto cu su yiu di 9 aña di edad.

E acusado: Tilico Lares

Tilico no ta esun di mas bon mucha na cas. Di acuerdo cu filenan di husticia, Igmar “Tilico” Lares ta naci dia 25 di mei 1989, pues tin apenas 29 aña di edad. Su nomber ta aparece diferente bez den registro hudicial y a sinti castigo dos biaha caba pa portacion di arma di candela. Tilico su tata a fayece como 20 aña pasa y su mama, Astrid, cu a taha hopi aña na Ministerio Publico, tambe a fayece algun tempo pasa den su oficina di bende catochi na Noord. Riba dje, dia di entiero Polis a detene Tilico y a haye cu un arma di candela, pa cual a cere pa un tempo. Na September 2017 el a recobra su libertad y ta purbando pa biba normal bek cu su pareha y 2 yiunan. Tilico mes ta di Primavera pero tabata biba cu su pareha y yiu na Rooi Bosal dilanti Rudsen Bar na Santa Cruz.

Mama di e victima na palabra den Corte

E mama di e victima a bisa cu su yiu, Pons, tabata biba cerca dje, hunto cu su yiu chikito di 9 aña. E tabata percura pa e yiu y Pons tabata contribui grandemente na economia di e cas. E mama di e victim a bisa den Corte cu e no ta compronde cu e acusado tambe ta tata y pesey e no ta compronde con e no por a pensa prome cu el a ranca un tata for di su yiu chikito y cu e consecuencia cu su mesun yiunan awo ta bay crece sin nan tata.

Demanda di Fiscal

Pa Fiscal di Ministerio Publico, e caso ta hopi cla. Un caso sin sentido, un morto sin motibo. E no por compronde pakico e uzo di e arma pa motibo di discusion riba un jacket anti bala. Su splicacion cu el a pensa cu e homber lo por tin un arma tambe, no ta proba y no tabatin nada di indicacion di esaki tampoco den actuacion di esunnan presente. Riba dje ta di tres biaha caba cu e acusado ta envolvi den caso di arma di candela. P’esey el a pidi un castigo di 15 aña incondicional. Dia 13 di juli lo tin sentencia.