Hues ta haya e acusado Igmar “Tilico” Lares culpabel di a mata Ponse Thiel for di un distancia di 4 meter cu un tiro den su curason. Diabierna mainta Corte di Prome Instancia a informa e acusado Tilico cu no tin awa pa laba, cu e pruebanan treci dilanti door di Ministerio Publico ta suficiente y cu pa esaki a hay’e culpabel di tanto asesinato di Ponse Thiel y intento di asesinato di e ruman di Ponse.
Hues a bisa Tilico Lares cu ta hopi lamentabel cu un persona ta perde su bida na un edad asina hoben, pa cosnan sin sentido. Su actuacion a laga un famia den tristesa y un yiu menor di edad sin su tata. Pa e motibo aki el a dicidi di bay di acuerdo cu e demanda di Ministerio Publico di impone un castigo di 15 aña di prizon incondicional.
Sinembargo, Corte no a acepta dos di e tres demandanan pa daño y perhuicio pa motibo cu nan no ta bon specifica, sin recibo pa hustifica e sumanan. Corte a bay di acuerdo si cu e acusado mester paga tur gasto di entiero di e victima, di casi 10 mil florin.
E acusado mes a sinta scucha e sentencia y no tabatin ningun expresion di lamento of di tristesa riba su cara, mientras cu patras di dje tabata sinta henter famia di Ponse Thiel. Durante tratamento di e caso mes Tilico Lares a expresa: “Mi ta lamenta loke cu a pasa. Niun momento tabata mi intencion pa tir’e”.
E hecho aki a sosode dia 23 di februari ultimo na su cas situa na Rooi Bosal. Tur e discusion a cuminsa pa motibo di un bulletproofvest cu e victima tabatin, cu e acusado ta bisa cu e no tabata kier na su cas. Esaki apesar cu e mes tabatin un arma di candela scondi den su cura, cual ta esun cu el a uza pa tira Ponse den pecho.
Ponse Thiel tabata hunto cu un grupo den cura di cas di Lares ta dal drinks. E tabatin un bulletproofvest cu pa motibonan desconoci e acusado no tabata kier riba su tereno. A surgi un discusion y hasta el a haya golpi for di Ponse, segun e acusado, pasobra el a bisa nan bay cu e cos ey for di su cas.
Loke cu a condena Tilico tabata cu el a bay coy un arma cu e tabatin scondi den cura. Pero a bay paden y enbes di keda paden, el a bolbe pafo y a start un confrontacion. Despues cu el a tira Ponse, e ruman di e victima a bin reclam’e pakico el a tira y a surgi un pelea unda cu a los un tiro atrobe cu a pasa banda di cabes di e ruman. Despues di esaki el a huy, a lora e arma den un paña y a tir’e den mondi. Polis a confisca e arma despues riba su mesun indicacion.
“Ta tristo”, Fiscal a bisa, “cu un persona ta perde su bida sin motibo”. E mesun expresion Hues a haci tambe awe mainta na momento di lesa e sentencia.
