Dialuna anochi The Ritz Carlton a organisa un evento na BLT Steak Terrace pa celebra e luna di “PRIDE” cu un grupo di invitado. “PRIDE” ta un celebracion cu ta tuma luga den luna di juni.
Den e periodo aki e grupo di orientacion sexual no heterosexual ta honra e asina yama “Stonewall Rising” di 1969 na Manhattan. “Stonewall Uprising” tabata e culminacion di e Movemento di Liberacion Gay na Merca. 
E ultimo diadomingo di luna ta tene e “Gay Pride Day”, pero rond mundo el a crece bira un celebracion di henter un luna y bou di personanan di diferente orientacion sexual. 
E cadena hotelero The Ritz Carlton ta para pa Igualdad y como tal a introduci e celebracion aki oficialmente den su hotel na Aruba tambe. Asina tur aña ta tene diferente actividad, incluyendo pafo di luna di juni. Asina nan ta celebra evento pa e genero aki tratando di promove Igualidad tanto bou di su empleadonan como clientenan.
Dialuna ultimo a invita un grupo di persona pa un evento na BLT Steak Terrace, unda a recorda con e celebracion aki a cuminsa y e motibo pakico The Ritz Carlton ta tene e celebracion aki. “Di e forma aki nos ta celebra Amor, Amistad y Inclusion cu tur nos hendenan.”
Invitadonan tabatin chens pa saca potret na e borchi di LOVE, unda cu e letter O a wordo adapta den forma di curason y cu e colornan LGBT.
