Recientemente ‘The “O” Foundation’ a keda oficialmente estableci como organizacion cu ta bai traha pa trece atencion na conservacion di nos coralnan, bida den nos ocean y proteccion di e mangelnan (mangrovenan). E coralnan ta provee un cas pa piscanan y ta fungi como proteccion di nos costanan.
E plantacion y cuido di mangrovenan tambe ta esencial pa cuida nos costa for di tormentonan y bientonan fuerte di horcan, olanan y inundacion. Cu desaroyo di turismo y debi na e “global warming” hopi bes esakinan ta keda afecta. Un di e prome projectonan pa ‘ The “O” Foundation’ ta a transplanta coralnan saludabel riba rifnan cu ta inactivo y ademas efectua un plan ambicioso pa re-planta mangrove.
Cu turismo como e sector mas importante di economia di Aruba, e reto ta keda pa por balansa e crecemento economico cu proteccion ambiental. “Nos intencion ta pa traha hopi di serca cu specialistanan y “stakeholder”nan riba e tereno di mangrove y coral y ta dispuesto pa motiva hotelnan y otronan pa join e accionnan pa yuda cuida nos ocean y bida den nos ocean. “Nos kier bai planta 200 mangrove den futuro cercano.”, segun e presidente di ‘The “O” Foundation’, Susana Maduro. Maduro ta un miembro voluntario di e committee di Relacion Publico di e movimiento “Ban Lanta y Planta” y ta sumamente positivo cu e desaroyonan den e normal nobo riba e tereno aki na Aruba.
