The Jazz Trip a crea un ambiente diferente na San Nicolas

Diadomingo, riba dia di Pasco di Resureccion tabatin un evento hopi apart na Pueblito Paisa na San Nicolas yama The Jazz Trip, unda cu amantenan di jazz por a bin hunto y disfruta di musica en bibo y no solamente manera cu ta yama ‘background music’ di un restaurant, pero realmente aprecia e talento cu cada un di e musiconan a sa di trece.

Ali Hector, hunto cu e restaurant, a organisa e evento aki, cu ta tuma luga riba cada di dos diaranson di luna na Pueblito Paisa.

Fo’i juni 2021 ta bezig cu nan edicionnan y ya nan a yega nan di ocho edicion. Den luna di april por cierto ta Jazz Appreciation Month rond mundo y debi na esaki a dicidi di haci esaki pafo.

A sa di cera e caminda cu e permisonan necesario. Hector a conta cu esaki ta un trabao di e hendenan di San Nicolas y hunto cu e restaurant a cera cabes y cana e caminda pa por a yega y haci e evento aki. E ta un trabao di hende cu ta stima San Nicolas y cu ta di San Nicolas pa haci algo diferente p’e bario.

Tabatin por lo menos 100 persona cu a atende e anochi aki. A haya sa di e evento via amigo, Facebook y Instagram tambe. Hector a menciona cu cualkier persona cu kier atende e otro edicionnan di The Jazz Trip, por manda nan un e-mail na [email protected].

Un di e cosnan di mas importante di The Jazz Trip, ta pa crea espacio p’e musiconan local. Diadomingo tabatin Carlos Bislip, Franklin Granadillo, Angelo Kock y Ivan Quandus.

E idea tras di mas grandi ta pa crea un espacio p’e musiconan ta aprecia, manera ya menciona den e articulo aki. E intencion ta pa bin y aprecia e talento cu nan tin, e añanan di dedicacion cu nan a hinca den e genero di Jazz. Tin un grupo di hende cu stima e genero aki y a bin hunto pa celebra, Hector a menciona.

Tin di bisa cu e esfera aki ta uno hopi intimo, unda cu bo por intercambia energia, amor y gratitud p’e musica hunto cu e musiconan den e restaurant. Si tin algun persona cu kier sa mas di dje, por manda un e-mail n’e adres ya menciona, pa por join p’e proximo edicionnan.