Colegio Aruba ta celebrando su di 60 aniversario. Pa e motibo aki mes a bin cu un fundraising event cu yama The Colegio Reunion, cual evento lo tuma luga den cura di scol mes. Kimberly Kuiperi, project coordinator di e evento, a splica esaki ta bayendo hopi bon. E aceptacion den pueblo y tambe riba Facebook cu ex Colegianonan ta algo hopi leuk pa mira. E evento lo ta diasabra awo, dia 23 di november. Ta pesey mes ta haci un ultimo yamada pa cumpra bo ticket y aporta bek na bo scol.
Kuiperi a comenta cu e motibo primordial ta cu e ta un evento di recaudacion di fondo. Tur placa recauda ta bay bek pa scol. Ta trata aki di un scol di 60 aña y e mester di su mantencion. Pa esaki mester fondo naturalmente.
E evento lo ta di 7’or di anochi pa 12’or di marduga. Robert Jeand’or y su Solo banda Show y Tsunami lo ta e bandanan invita. Tambe tin DJ Eldrick, DJ Nutzbeatz kende tambe a bay e scol y tambe Big Rig.
Fuera di esey lo bay rifa un weekend stay pa tur esnan presente.
Ticket na benta
Tin ticket obtenibel ainda na Citgo Boulevard, Citgo Palm Beach, Citgo Essoville, Paradera Gas Station, na scol mes y tambe riba e anochi aki lo bende ticket. Entrada ta 60 florin pa persona, incluyendo un welcome drink. Tambe tin un tarifa special pa grupo di 10, cual lo ta 50 florin pa persona.
Invitacion
No ta enfoca solamente riba ex-colegianonan, pero tambe na tur esnan cu kier aporta. Bo no mester ta un colegiano pa bo atende e evento aki. Si bo ta mayor y bo yiu actualmente ta bayendo e scol, bo ta mas cu welcome. Si bo tabata trip banda di e scol, bo ta mas cu welcome. E idea ta pa rebiba bo hubentud, e bon temponan, temponan cu b’a studia duro, tempo cu bo a conoce bo amistadnan pa bida, bin diasabra awo, dia 23, aporta na un bon causa. Ta fin di aña, asina duna bek na bo comunidad.
Entrada
Pa comodidad di tur hende, ta bay tin dos entrada. E entrada principal, ta e famoso hall y tambe patras, ya cu cerca di stadion ta suficiente parkeo. Ta conta cu siguridad pa wak pa e autonan. Mirando cu ta den propiedad di scol, ta tene cuenta cu e orario. Elite Production lo percura pa un ambiente cozy. E evento aki no ta di un periodo di colegianonan so. E ta pa tur hende cu a yega di bin Colegio. Ta ahustando e setting pa tur esnan cu lo bay tey presente. Elite tambe lo bay yuda cu e decoracion. Bunita ta cu ta purbando di laga e evento aki hopi raw. E bañonan di scol, lo ta e bañonan di e anochi aki. Idea ta pa rebiba y bay bek den tempo y e comision ta hopi contento pa ricibi tur hende diasabra awo.
Reconocimento
Durante e anochi aki lo bay reconoce 10 hende den comunidad cu tin e base di Colegio, cu a bay den diferente carera, den diferente area y a sobresali den nos comunidad. Tin diferente area caritativo, medicina, musica, arte, politica. E ta bay ta algo hopi interesante y bunita pa wak.
