Dialuna anochi e personal di Guarda Nos Costa a drenta hanchinan di San Nicolas y bay cu alrededor di 14 dama. A tuma nota cu algun siman caba e hanchinan di San Nicolas a rebiba cu presencia di e damanan cu tey pa sasia e sed sexual di homber of muhe a cambio di placa.
E unico diferencia ta cu e presencia di e damanan aki no ta legal manera antes. E damanan aki a yega Aruba como turista y a bay biba pariba den e cambernan di e barnan. Nan no ta legal cu e control necesario manera semper. Di otro banda no por keda sin menciona cu e bida di San Nicolas ta basta morto ora cu e prostitucion ta ausente.
Pa algun tempo caba e doñonan di bar ta buscando tur manera pa gobierno duna audiencia y asina nan regla e problema di e barnan cu damanan na San Nicolas.
Mientras cu a habri Bar Restaurant na Playa cu hasta seis hende na mesa, otronan nightclub habri cu reglanan of protocol, na San Nicolas si ta strobando e barnan habri den e hanchinan. E doñonan di bar a wanta algun luna, pero awor aki no por mas. Nan tin famia pa cria, huur pa paga, awa y coriente pa paga y no por draai nan bar. A haya e chens pa huur e cambernan cu e damanan aki y asina a logra genera un entrada pa cubri e gastonan di huur y sobrevivi e crisis.
Hasta e adictonan ta contento cu e hanchi a medio lanta bek cu movecion di auto cu presencia di e damanan. Nan tambe ta haya algo di placa cu presencia di e trafico cu ta keda draai y tambe for di e damanan trahando cu ta duna nan algo. Cu e presencia di GNC a spanta tur e resto di e damanan cu tey trahando. Nan lo no kier sali pa asina evita cu nan ta ser gara. Sinembargo di un trato inhusto tumando luga contra e barnan di San Nicolas.
Gobernantenan sinta no a perde entrada pasobra sagradamente nan salario tey. Traha of no traha e gobernantenan ta cobra. Di otro banda nan no ta worry y ta mata e comerciante teniendo nan negoshi cera desde maart 2020. Nos ta un aña leu. Dicon pa cierto grupo si, y otronan no. Contagio di Covid ta sigui cu bar cera of bar habri.
E suplica ta bay na gobierno pa atende cu e situacion aki. Reglanan mester wordo aplica pa asina e barnan di San Nicolas tambe por habri bek. Asina ta evita tambe prostitucion ilegal na San Nicolas. Si stop prostitucion ilegal na San Nicolas, e lo sigui ilegal otro caminda toch. P’esey ta importante pa gobierno atende cu e problema y zorg pa cuminsa activa cu reunion entre e doñonan di bar pa asina rebiba e area atrobe.
