Trabounan nesesario, na viadùkt A.A. de Lannoy-Willems Boulevard for di Arubastraat bai Koningin Julianabrug direkshon di Punda, ta kousa ku outomobilistanan lamentablemente mester tuma un ruta adaptá.
Durante fin di siman di 22 i 23 di yüli próksimo i tambe riba e fin di siman di 29 i 30 di yüli próksimo, e kaminda bou di e viadùkt menshoná ta será pa tráfiko entre 8’or di mainta i 5’or di atardi. Pa por yega na nan destinashon, tráfiko ku ke bai den e direkshon di Punda i ku normal ta pasa bou di e viadùkt di Arubastraat, mester sigui e diferente bòrchinan ku ta duna un guia na kon pa kore. Ta sera e via ku normal ta skohe pa bai direkshon di Punda, pero e via ku ta bai direkshon di Seru Dòmi si ta keda habrí. Tráfiko pa Punda mester sigui bai e lusnan di tráfiko na Seru Dòmi i hasi un ‘u-turn’ pa bai bèk na e direkshon deseá. Trabounan intensivo na e diferente viaduktonan di Kòrsou ta nesesario pa motibu ku tin bastante forma di daño , entre otro na e betòn, na e heru den e betòn i na e balustradanan banda di e viaduktonan.
E trabounan ta tuma lugá pa algun tempu kaba den diferente fase, pa motibu ku ta trata di un renobashon struktural i duradero. Ora ta kla ku tur e viadukto na Arubastraat, ta sigui ku esun na Skalo. Kontratista Betonbouw NV, Obra Públiko i polis tékniko ta pidi públiko pa tene kuenta ku e trabounan i adaptá nan ruta durante di e trabounan di mantenshon. Ta pidi outomobilistanan pa tene kuenta ora ta trafiká den besindario di e viadùkt.
