Tendencia positivo: Mas hende ta curando cu contagiando cu Covid-19

2616

Departamento di Salubridad Publico Aruba (DVG) a informa awe tardi cu 163 persona mas a recupera di Covid-19 na Aruba entre ayera pa awe. Esey ta un cifra halto di esunnan contagia cu a termina cu nan dianan den isolacion y awo ta cla pa drenta mercado laboral bek y drenta comunidad bek. E proceso di isolacion ta dificil y hopi biaha ta mas duro cu e virus mes, pasobra hopi hende ta hay’e sin sintoma, pero toch mester keda cas pa evita contagio.

Ta nota si cu e cantidad di casonan nobo ta bahando sistematicamente, awe a registra solamente 35 caso nobo di Covid-19, cu ta traduci den 20% di “positive rate”. Di acuerdo cu DVG, tur e casonan positivo registra awe ta residente. E cantidad di casonan activo cu Covid-19 a baha cu 128 persona y ta awe na 1067 persona.

DVG a informa awe cu nan a realisa 255 test, di cual testnan haci bou di residentenan na laboratorio di hospital ta 177, mientras cu e resto a haci na Aeropuerto.

E casonan fatal di Coronavirus na Aruba a keda mesun cos, pues tin 25 pashent cu a fayece pa motibo di e enfermedad aki. Danki Dios cu no tabatin ningun caso adicional entre ayera pa awe.

Hospital a informa cu tin un total di 36 persona interna di cual 11 ta den unidad di cuido intensivo y 25 ta isola riba piso general. Tin un total di 10 persona cu ta den cuarentena, pendiente resultado di test di Covid-19 haci den Hospital mes, pero cu ainda no ta cla. Mañan lo haya e resultado di e 10 pashentnan aki si nan a test positivo of negativo, cu lo por afecta e cifranan di diabierna.