Tempo ta cabando: diaranson ta deadline pa Ady Thijsen

No tin claridad ainda si ex-presidente di Parlamento, mr. Juan E. ‘Ady’ Thijsen lo drenta parlamento. Segun presidente di parlamento, mr. Edgard Vrolijk a bisa cu no ta berdad cu Thijsen a nenga di bin bek den parlamento, pero mas bien Thijsen no a tuma decision ainda. Esaki t’e motibo cu Ricky Hoek tabata den parlamento dialuna. Thijsen tin un opcion ainda. Si e no acepta, Hoek lo drenta parlamento. Ainda mr. Edgard Vrolijk no tin claridad riba dje, pero mas bien den careda di diaranson, ora cu tur e documentonan yega y durante vastlegging di Electorale Raad lo haya sa si mr. Juan ‘Ady’ Thijsen ta den of e no ta den. Si e no ta den, e ora Ricky Hoek lo drenta parlamento. 

Durante reunion tambe, mr. Edgard Vrolijk den su funcion como  presidente di parlamento, tabata basta skerpi cu no solamente oposicion pero tambe cu coalicion. na dado momento el a hasta ‘para’ su colega di partido Eny Croes y a hasta hala atencion di propio lider di coalicion, mr. Evelyn Wever-Croes. Segun Vrolijk, su trabou no ta pa representa partido MEP, pero pa traha na interes general. 

Tur hende ta papia di independisacion, tur ta papia di e procesonan. Naturalmente den e proceso ey, mester ta mas neutral posibel pa haya ayudo di tur fraccion pa logra esaki. Mensahe ta masha cla: no ta tolera niun di dos banda. E ta respeta tur hende nan momento di papia y no ta permiti interupcion di niun di dos banda. Ta manera un meneer di scol, hala atencion bay bin. Su maneho awo ta cla. 

El a bisa tambe di no tin ‘hard feelings’ tocante cu a scoge Endy Croes pa bira minister di enseñansa, Vrolijk a bisa cu democracia a papia. Su background, como maestro di scol kisas hopi lo a spera pa Vrolijk lo ta e proximo minister di educacion, pero lider di partido a dicidi otro. Kisas a bay pa esunnan cu a haya mas voto. Vrolijk tin diferente angulo den cual e por eherce su trabou, no solamente como minister di enseñansa, ya cu el a studia maneho tambe y tambe el a studia ley. Pero el a desea Endy Croes hopi exito, mirando cu enseñansa mester di hopi atencion.