E proceso di formacion pa un gobierno nobo, ta tumando demasiado tempo pa hopi hende y instancia ya cu e momento pa un gobierno nobo asumi responsabilidad gubernamental di e pais, ta un momento cu hopi hende ta anhelando.
Tur hende kier mira un cambio y e interes pa un otro gobierno cu no ta uno bou di liderazgo di Evelyn Wever Croes, ta hopi grandi y mas ainda pa esunnan cu ta pasando momentonan dificil den nan bida diario pa falta di un entrada husto y respetuoso.
Awe diahuebs ta otro dia den deliberacionnan entre Mike Eman y Gerlien Croes cu lo ta dia number 104 y pueblo den su totalidad ta sperando riba e anuncio oficial di e coalicion nobo, e candidatonan pa minister y e fecha di instalacion oficial cual lo ta den man di Gobernador Alfonso Boekhoudt.
Mientras cu e tardansa aki ta algo inusual den politica di pais Aruba, den cierto forma e ta mustra cu e dos partidonan cu lo carga responsabilidad den gobernacion pa proximo cuater aña, ta tumando e mandato aki hopi na serio y ta tumando tur tempo cu tin, pa hinca un programa di gobernacion den otro, cu lo ta efectivo, cu lo ta concorda cu otro.
Un plan caminda cu pa prome bes desde 2017, pueblo lo conoce gobernacion di dos of mas partido pero sin cu lo mira dos gobierno separa di otro tumando nan decisionnan y sin consulta cu otro.
Despues di eleccion di 2017, ya tres ora despues cu resultado a drenta y caminda AVP a gana eleccion pero no a logra mantene su mayoria den Parlamento y ya pa mey anochi tabata conoci cu lo tin un gobierno di coalicion nobo y cu e coalicion nobo lo consisti di MEP cu 9 asiento, partido POR a saca dos asiento y RED a saca 1 asiento y asina a yega na un mayoria den Parlamento cu 12 asiento.
Prome cu klok a bati pa mey anochi, lider di partido POR, Otmar Oduber a anuncia cu nan lo ta e yabi di e proximo gobierno di coalicion y algun minuut despues, tabata lider di MEP, Evelyn Wever Croes kende a anuncia cu su partido lo forma parti di un gobierno nobo y RED di Ricardo Croes, a uni su mes mas laat pa sigura un gobierno di 12 asiento.
Gabinete Wever Croes I a keda instala dia 17 di november di 2017 cu ta 56 dia despues cu eleccion di 2017 a tuma luga dia 22 di september 2017 loke ta demostra cu e tres partidonan den nan ansha pa caba cu gobernacion di AVP, a cana kibra y forma un coalicion cu a cay despues ora cu MEP a keha e lider di POR, Alan Howell kende tabata ser investiga pa fraude cu fondonan di e fundacion di Fraktiemedewerker.
Pues 56 dia pa cambia rumbo administrativo di un gobierno di ocho aña di Mike Eman cu simplemente no tabatin un plan di maneho adecuado y a bolter tur loke gabinete Mike Eman a introduci for di 2009.
Dia 25 di juni di 2021 a tuma luga eleccion pa un gobierno nobo y aki partido MEP y RAIZ tambe a anuncia nan intencion di goberna cu otro, den cuestion di algun dia pero e coalicion nobo aki a bira oficial dia 20 do september di 2021, cu ta un total di 87 dia di duracion.
Pues aki tambe a tuma un periodo mas largo cu e formacion na 2017 pero gabinete Wever Croes II forma entre MEP y RAIZ tabata cla caba for di algun dia despues cu eleccion a tuma luga y tabatin mesun situacion cu gabinete Wever Croes I a produci, esta un coalicion cu tabata dos gobierno den uno.
Ta mas cu claro cu e diferencia tabata grandi, cu e dos partidonan simplemente no tabatin mesun vision y tabata durante di nan periodo di gobernacion, cu nan a bin conoce otro mas tanto cu consecuencia cu e falta di confiansa a sigui crece te cu el a culmina den caida di e coalicion na final di september di 2024.
Si tardansa di e actual coalicion di AVP y RAIZ ta tumando demasiado tempo, esaki por ta indicacion cu ambos partido kier claridad riba e vision concreto cu nan tur dos kier mira den e proximo periodo di gobernacion y evita asina cu pueblo di Aruba lo bolbe haya su mes c’un gobierno cu ta tambalia tur dia of pa cualkier decision cu tin cu ser tuma.
Ta di spera cu en berdad un periodo nobo a yega cu e tradicion di politiconan cu ta bin dilanti dispuesto pa carga responsabilidad di gobernacion pero na final di cuenta nan ta resulta di a pone nan propio interes dilanti di e interes di pueblo.
