Tema sentral durante presentashon funshonamentu CGOA den kuadro di selebrashon 50 aña di NAPB

Den kuadro di e selebrashon di e sinkuenta aniversario di e sindikato ‘Nederlands-Antilliaanse Politiebond’ (NAPB), direktiva di NAPB, kompañá pa representante di sindikatonan di polis di Aruba, Boneiru, Sint Maarten i di e Confederación Latinoamericana de Trabajadores Estatales (CLATE) a haña djárason dia 20 di novèmber último den sala di reunion di CGOA un splikashon amplio i konsiso riba funshonamentu di CGOA (Centraal Georganiseerd Overleg in Ambtenarenzaken), ku ta e órgano di konsulta bipartit, instituí pa lei, entre gobièrnu i representantenan sindikal di empleadonan públiko, den kua ta atende ku tur asuntu ku ta regardá posishon hurídiko di ámtenarnan di Kòrsou.

E splikashon a ser duná dor di señor drs. Raul Henriquez, direktor i sekretario general di e ofisina enkargá ku asesoramentu di entre otro e órgano CGOA. E presentashon a bai kompañá pa un lùnch. Durante di e presentashon a elaborá riba e kuadro hurídiko, institushonal i finansiero di CGOA i a para ketu na e importansia di ratifikashon di e konvenio C151 di e Organisashon Internashonal di Trabou (ILO) ku ta rigi e relashonnan di trabou den atministrashon públiko. E konvenio aki a ser ratifiká dor di Kòrsou na aña 2016.

Aña pasá Kòrsou a manda su promé informe riba kumplimentu ku e konvenio aki na ofisina prinsipal di ILO na Ginebra, Suisa. Ei den a konkluí ku por lo general Kòrsou ta kumpli ku e konvenio aki.

Basá riba pregunta- i remarkenan hasí dor di e invitadonan durante e enkuentro di djárason último por a saka afó ku mayoria di paisnan den Latino Amérika i di Karibe no konosé un plataforma similar na CGOA. Pues pa hopi tabata un ‘eye opener’, miéntras e sindikatonan di polis di Aruba, Boneiru i Sint Maarten, ku tabata huéspet di NAPB, a trese pa dilanti ku nan diálogo ku nan respektivo gobièrnunan ta tuma lugá riba un manera ku no ta komparabel ku CGOA. Konsekuentemente nan mester hasi sierto ahustenan i formalisá nan diálogo bipartit ku dunadónan di trabou di un forma mas efektivo.

Na final e presentenan a interkambiá di pensamentu ku otro i a enfatisá e nesesidat pa traha den futuro den estrecho kolaborashon ku otro pa no solamente siña for di otro su puntonan fuerte sino tambe pa mantené lasonan amistoso.