Un anochi yena di adrenalina puro. For di e salida te na momento cu e team ta drenta bek hunto pa e final, ta puro emocion y concentracion. Preparacion di varios luna ta concentra riba un solo anochi di esfuerso maximo pa core e miho careda posibel. Train Hard Race Easy (THRE) consistiendo di e coredonan: Andre Angela, Joatham Kock, Gabriel Prato Ovalles y Jesus Galea cu a sali exactamente 11:42 for di Mariniers Kazerne, cu un solo meta, pa gana e Ronde van Aruba un biaha mas.
Joatham Kock direccion pariba tabata e prome coredo pa subi ruta di Ronde van Aruba pa Team THRE cu a carga e nomber di Trempan riba uniform. Un experiencia emocionante igualmente pa e team di 24ora cu a cubri e magno evento deportivo aki henter anochi.
Durante cambio di coredo riba ruta, a haya oportunidad pa combersa cu e coredonan di team THRE den algun transmision live cu a haci. Tabata pusha hopi duro y anima cara coredo pa asina tene e animo halto.
Publico grandi na banda tambe tabata curasha cada coredo pa sigui duna mas di nan mes pa asina completa cada trayectorio di e ruta.
Como e record holder di e Ronde van Aruba, team THRE tabata e ultimo team pa sali for di Kazerne y mientras anochi tabata transcuri, e velocidad tabata subi poco mas pa asina yega na e tempo record di aña pasa.
Despues di a core 71.2 Km den 4:41:24 e team di THRE ta logra gana e careda den su categoria Estafette 121 t/m 160 jaren. E biaha aki no a yega e record, pero tampoco no tabata mucho leu di dje, e record pa 2021 (cu ta e record vigente ainda pa 2022 y cu ningun team a logra kibra) tabata di 4:34:51 cu ta haci nan e course record holders keto bay.
E aña aki un cantidad record di participante a inscribi pa core e buelta como individuo. En total tin den esaki 20 homber y muhe. E otro participante- y teamnan a cuminsa entre 8:00 pm y 12:00 am riba diabierna anochi. Cada minuut un team of duo nobo tabata start.
Careda di distancia largo a bira un di e deportenan mas comenta ultimo tempo. Hopi atleta ta dedica y sacrifica tempo y energia den e deporte aki pa mira cada biaha un miho presentacion. Pa e motibo aki, Trempan a pone su confiansa un biaha mas y a sponsor e team Train Hard Race Easy (THRE) pa e Ronde van Aruba cu a haci un tremendo trabou.
E nomber di e team, Train Hard Race Easy (THRE) ta papia pa su mes, nan tabata den training extensivo pa e careda aki. Como un di nan sponsornan, nos a sostene y a compaña nan riba ruta. TREMPAN ta mira e importancia pa brinda e sosten aki na nos atletanan, cu ta haci esfuerso pa hiba e deporte dilanti y ta ehemplar na e comunidad cu kier forma parti di e mundo di deporte.
Riba anochi di 20 di mei 2022 e di 30 edicion di e Ronde van Aruba a start. E evento di careda, organisa pa Marinierskazerne Savaneta, ya ta existi desde 1971. Dos marinier un tempo pasa a reta nan mes pa core ‘solo’ rond e isla. Desde e momento ey e idea aki a crece bira un evenemento cu anualmente ta ripiti. E distancia ta 72 kilometer di largura, locual pa gran parti ta sigui a lo largo di costa di e isla y ta un di e caredanan di mas pisa y largo den Region Caribe. Gobernador di Aruba, Su Excelencia Gobernador ta esun encarga mayoria biaha pa duna e tiro pa salida.
Felicitacion ta bay na tur participante cu e haci e evento aki uno mahestuoso pa deporte en general, pero muy specialmente na team Train Hard Race Easy (THRE) cu a carga e logo di Trempan orguyosamente y a sa di logra gana pero principalmente participa y engrandece deporte di careda di distancia largo.