Diasabra ultimo, un biaha mas e team miho uniforma den hemisferio occidental, esta Team SNOR bou guia di prof. drs. Snor Perez, “meester in de steenkunde”, a sa di luci atrobe na e unico Domino Square Garden na mundo, nada menos cu 99 Bar & Restaurant.

E ekipo cu a challenge Snor tabata Team BENA DI KOPER, kende nan a haci nan debut den fin di siman. Un nomber por cierto poco straño y cu ainda ta un enigma, y pa cual muy pronto mester bay “schakel” e conocido Dr. Phil di “de vrije savanne” pa bin haci un investigacion profundo!

Den prome mita e “ace” nan di Team Snor ta kibra otro record di 99 Bar! Den menos cu’n ora ya ta bati half time cu score di 11 – 3! Algo nunca bisto, cabando cu tur koper cu Team Bena di Koper por tabata tin! Den mitad di tempo e snacks nan completamente gratis a skeiro rond, mientras cu e chicas nan di Ron Tropical tabata duna fanaticada oportunidad pa gana premionan fabuloso!

Den segundo tempo si e team nobo aki, cu por cierto tin algun cara familiar ta figura aden, ta saca nan huña y ta mustra Snor cu muy probablemente otro biaha ta otro gayo lo bay canta! E segundo tempo ta caba cu score preta di 10 – 9! Lenganan siniestro ta insinua cu ta doño di luga a bay suplica Snor na rudia pa please bay suave y duna e luga chance pa bende un tiki… Den total dus, Team Snor ta mustra di a haya un victoria aplastante cu score di 21 – 12. Ken lo bay cu e copa final di 99 Bar & Restaurant? Keda pendiente shonnan pasobra cos ta cayente!

Comments

comments