Team caba co’ a pasa den wowo di hangua

E unico Domino Square Garden na mundo, esta e conosido 99 Bar & Restaurant na Kudawecha, a conose un partido di domino cu a sacudi fundeshi di varios cas den vecindario diasabra siman pasa!! Den un encuentro eletrificante, e team nobo ariba cuadra, e apasionado Team “SERO BLANCO BOYS” a mustra e trabuconan di tur tempo, esta Team “CABA CO’ AWO!”, cu nan ta bay bin pa un y tur y cu nan ta bay tey pa keda pa hopi tempo!! Nan a fit mescos cu’n piedra den sapato cu ni cuanto bo sacudi pia, e no kier sali zomaar!!

Den prome mitad di e partido, cos tabata mustra relativamente stabiel pa Team Caba Co’. Nan ta drenta half time cu score di 11 pa 6 den nan bentaha. Pero, den un entrevista exclusivo cu e capitan di Team Caba Co’, por a nota un temblor chikito di preocupacion den su stem ora el a declara: “laga nos gana prome, anto e ora mi por papia…”

Hmmmm….por ta e wowo experto di capitan a wak nubianan scur n’e horizonte cu su marineronan no a ni ripara ainda? Por ta su experiensia di añas ta bis’e cu e lama keto ta camufla e corientenan fuerte cu tin ey bou?? Wel shonnan, e di dos mitad a bira un bataya emocional di proporcionnan biblico! E propetario di 99 Bar & Restaurant mester a saka su buki di filosofia di Confucius pa husa delaster triki diplomatico pa pone e Israelita y Palestino nan presente no ranka cabey di otro! E ambiente di un Kudawecha Square Garden rand rand di Chicas Polar, Partisipante, y Fanaticonan a bira electrificante ora cu e gang apasiona di Sero Blanco a nenga di tira serbete blanco den ring, y a cuminsa un trayectoria di “nos ta bin di patras”!! Despues di un lucha enorme, Sero Blanco Boys ta hasi un come back impresionante y na dado momento tenshon no ta coi wanta mas na Kudawecha ya cu e score ta na 20 – 18 pa Team Caba Co’!! E aire frieuw di airco ta manera carga cu electricidad ora cu Sero Blanco Boys ta corta bentaha na 20 – 19!! Gritonan di emocion ta mescla lamentonan di frustracion ora cu Sero Blanco ta empata sensacionalmente na 20 – 20!!! Histeria total ora cu ambos team ta haya un atake masal di gana di urina y “no hay baño para tanta gente”! Al final e grito cu Team Caba Co’ a laga bay ora nan ta gana cu 21 – 20 tabata di proporcion nan orgasmico!!! Sensacionalmente Team Caba Co’ ta pasa door di wowo di hangua!! Na final, ambos team ta brasa otro sportief y e fiesta Polar ta sigui den bon ambiente te den oranan chikito di mardruga.

Shon nan wanta duro pasobra diasabra awo, 22 di juli, cuminsando pa 8’or di anochi, e “never give up” Team di Sero Blanco Boys lo bay enfrenta nada menos cu e “smooth operators” nan di Team Snor!! Wanta duro shonnan, esaki ta mustra un horcan di categoria 5!! Team Snor vs Team Sero Blanco Boys, diasabra awor 22 juli, cuminsando pa 8’or na 99 Bar & Restaurant, e Domino Square Garden na Kudawecha! Yegaaa!!!