Team Aruba tin e honor di anuncia nan participacion na e evento di PDRA (Professional Drag Race Association) cu lo tuma tuma lugar na e pista di e compleho Lucas Oil Raceway na Clermont, Indiana, entre 13 y 15 di Juli di e aña aki.
E asociacion di drag racers profesional ta na mitad caminda di nan di cuatro temporada. Pa e equipo di Extreme Pro Stock Aruba te ainda e temporada tabata hopi exitoso. E categoria a crece danki na e solidaridad di Trevor Eman y su equipo cu actualmente ta ocupa e di dos lugar den e calificasion pa e campeonato.
E siguiente meta di e tour 2017 ta e mas spera pa Team Aruba ya cu e ta tuma lugar na un di e pistanan mas emblematico den e historia di Drag Racing. Lucas Oil Raceway na Indianapolis ta e cas legendario pa NHRA unda aficionado y coredo por disfruta di e competencia nacional mas grandi y prestigioso na merca.
Trevor ta comenta: “Nos ta hopi contento di por participa na e evento di PDRA ya cu e lo tuma lugar na un lugar historico”. Trevor a enfatisa: “Nos tin e oportunidad pa hasi historia, nos tin e speransa cu nos por crea momentonan inolvidabel pa nos team y cambia historia di Aruba den categoria di drag racing”.
“Awe nos ta bay hasi varios prueba (Diahuebs) y asina prepara nos team pa e calificacion di mañan”. Trevor ta continua: “Awo den temporada di verano nos ta spera temperaturanan mas halto cual nos tin cu tuma na cuenta na e momento di configura/ adapta nos sistema y auto. Nos ta positivo cu nos ta bay tin un bon careda awe y bon preparacion pa calificacion y eliminacion. Lo ta un honor pa nos logra un victoria aki na Indy pa Aruba. Considerando cu nos tin un bon posicion den puntahe y nos kier sigi nos meta pa alcanza éxito na e campeonato di Extreme Pro Stock Championship”.
Calificacion ta cuminsa mañan y lo continua te cu diasabra. Eliminacion pa e Mid-America Showdown lo cuminsa Diasabra atardi. Esnan interesa por wak e transmision en vivo y directo via www.SpeedVideo.com.
Sigi Team Aruba riba Facebook y Twitter. Haya sa di nan resultado, actualizacion di e team nan, videos y potret di e evento. Laga bo comentario di apoyo pa Team Aruba!
