TDQ: Cantidad di detencionnan ta sigui baha!

5191

Ayeranochi pa awe marduga, durante e di 13 dia di Toque de Queda (TDQ), cu ta cuminsa 9:00pm pa 6:00am, a detene no menos cu 5 sospechoso so! Esey ta e cantidad record te awo den menos detencion desde a start cu e TDQ. Por conclui, compara cu e dianan anterior, cu e mensahe ta yegando na comunidad y mas hende ta kedando cas enbes di subi caya di forma ilegal. 

Mester tene cuenta cu cada persona cu subi caminda entre 9:00pm y 6:00am sin tin un permiso of un motibo valido, por ehempel bayendo botica pa busca remedi of bayendo Hospital pa tratamento medico, cu autoridad por duna Bo un multa. Fiscal por scoge, na su discrecion, un multa cu ta un minimo di 1.000 florin te un maximo di 10.000 florin. Mayoria hende deteni pa prome biaha a haya 1.000 florin pero esunnan cu a gara pa di dos of mas biaha, a haya multa mas halto. 

Tur cu haya multa tin dos siman pa cumpli cu e pago, sino lo haya un citacion pa presenta dilanti Hues. Mayoria biaha ora yega Corte, e chens ta hopi grandi cu e multa ta aumenta. Si no paga atrobe, lo busca e sospechoso pa bay cera y cumpli cu e castigo comberti den dianan den prizon. 

Pa locual ta e detencionnan di Toque de Queda desde e prome anochi ta como lo siguiente:

  • Prome dia: 31 detencion
  • Di dos dia: 45 detencion
  • Di tres dia: 18 detencion
  • Di cuater dia: 29 detencion
  • Di cinco dia: 18 detencion
  • Di seis dia: 22 detencion
  • Di shete dia: 27 detencion
  • Di ocho dia: 28 detencion
  • Di nuebe dia: 16 detencion
  • Di dies dia: 8 detencion
  • Di diesun dia: 8 detencion
  • Di diesdos dia: 6 detencion
  • Di diestres dia: 5 detencion