Pa mas cu un siman caba Watty Vos Boulevard a habri y ta puro comentarionan positivo tin di parti di no solamente e usuarionan habitual, pero tambe taxistanan cu ta transporta e turistanan, pa y for di aeropuerto.
Linda Orman,taxista, como tambe vocero di e bondnan di taxi,a comenta cu el a haya feedback di parti di su coleganan. E caminda aki a yuda hopi, vooral den e stagnacion cu tabata tin den Playa. El a habri e trafico mas for di otro.
Tambe e ta facilita e ruta pa hotel. E ta yudando basta den e tempo cu tabata perde antes ora di pasa Playa, cual por dura tin biaha 20 pa 25 minuut, vooral cu barco den stad y den rush hour, ora cu tur hende caba cu nan trabao y bay cas. Awo, tin menos problema.
E servicio pa yega e destino rapido
Respetando naturalmente reglanan di trafico, e ta bay kita e fila di hende wardando pa taxi na aeropuerto. E taxinan ta sali p’abao y yega p’ariba den menos tempo awor aki. Nan por yega drenta stage di biaha pa coy e next trabao bin abao, mientras cu e otronan ta yega. Solamente riba dianan extra special lo por haya tiki pegamento. Awor aki el a alivia e liña di hopi turista ta warda taxi. Esey ta un di e puntonan importante.
E di dos punto, esnan cu ta traha den Playa, ta haya un alivio. Awor aki cu a cera e bijstrook, por mira cu nan cer’e por nada. Nan a saca e taxistanan afo por nada. Awor aki no tin nada di shortcut, nada di esey mas.
Unico cos awor aki ta cu e taxistanan kier haya acceso na e bijstrook bek. Ora tin barco por baha y subi hende na gate pa bay na cualkier otro destinacion, sea ta hotel, beach of cualkier un otro caminda.
Ta spera cu a wak caba e situacion cu a cambia full y duna e taxistanan acceso pa haya e bijstrook. Mescos cu a kit’e, por pone bek. Den menos cu 24 ora nan a keda esaki. Awor aki tambe por pone bek den 24 ora. E taxistanan tin derecho pa ta eyden, nan tambe ta duna e servicio.
Un caminda importante
Ronny Gomez ta un taxista, colega di Linda Orman, y a comenta cu e caminda aki ta uno hopi importante, vooral pa e taxistanan. E ta hopi contento cu e ruta aki a habri. E no mester a habri awor aki, sino 30 aña pasa. Di 30 aña pasa e tabata sa cu e caminda aki a bin y hopi hende no a realisa di su importancia.
Awor aki pa bay otro destinacionnan, awo nan ta yega hopi mas lihe, compara cu anteriormente. Si un hende bisa cu e caya aki no ta importante, anto e ora e no sa di kico e ta papia. Tin biaha ta pasa e ruta y rotondenan sin sa, unda bo ta. Bo tin cu tene cuenta na cua rotonde cu ta caminda cu bo tin cu bay. E ruta aki ta asina importante, cu bo no ta imagina, segun Gomez.
El a haya su mes den e ultimo dianan hopi turista, cu el a transporta for di aeropuerto, ta puntr’e kico e mes ta pensa di e ruta aki, vooral e turistanan cu ta repeat guest. E ruta aki ta laga e taxistanan ta gana tempo. No nan so, sino tur hende, esnan cu ta deliver, por ehempel.
Ni cu pasa downtown, cu e ruta aki, un hende ta yega su destino mas lihe y bunita.
Fuera di esaki, loke cu por a nota riba e ruta, cu el a haci Aruba hopi bunita. El a dun’e un bunita bista. Aruba no tin hopi bista. Y esaki ta un muestra cu por bende Aruba su bunitesa. Ora cu mira e rotonde di Tanki Leendert pa Ponton, e piedranan cu tin na banda, ta masha bunita mes.
Aruba tin problema di trafico masha grandi mes. Gomez ta spera cu por dura hopi aña prome cu e bira un problema atrobe. Un hende cu ta biba na Aruba no por bin bisa cu e ruta aki no ta importante.
