Taxistanan a reuni na aeropuerto Reina Beatrix, caminda cu nan ta rabia. Rabia pasobra Minister Chris Romero ta bisa un cos y haci otro. Segun Linda Orman, vocero di e taxistanan, nan a pidi cooperacion di prensa pa asina vocifera nan disgusto un biaha mas.

Taxistanan a manda carta pa e minister, nan a tene un rueda di prensa y tampoco no a tuma contacto cu nan. Contrario na e oficina di Minister Bikker, a tene contacto cu sr. Baez, kende a duna su disculpa y a bisa cu tabata su fout cu e no a haya contacto mas cun’e. El a disculpa eticamente.

Minister Romero kier tuma desicion sin consulta cu Taxistanan

Posted by 24ora on Saturday, September 14, 2019

Pero for di Minister Romero nada ainda. El a sa si di bay den un noticiero. Ora cu a puntre e problemanan di taxista, el a contesta cu e tin un solucion y bin cu un app. E ta bezig cu minister Dangui Oduber, cu ta bay cay bao di AAA.

Orman a sigui bisa cu e app no ta soluciona e problemanan cu nan tin di pirateria, di ilegalidad, etc. Su ponencia ta, ora turista yega Aruba, e ta bay na e app, e ta haya un taxi. Orman a enfatisa cu na Aruba no ta turista ta warda riba taxi, ta taxi ta warda riba turista. Unda cu tin un turista para pafo, tin taxi para ta warda, cla pa transport’e, sea pa hotel, aeropuerto, restaurant, etc.

E facilidad pa un turista ta transporta ta 99% optimal. E minister ta anuncia publicamente cu ta bin cu e app, pero no a sinta cu e taxistanan un dia informa nan di esey. Si nan ta esun cu supuestamente ta bin cu e app pa e taxistanan, mester sinta cu nan. Nan mester haya sa esaki via un noticiero y bisa cu e ta casi cla, pa colmo. E taxistanan no tin ningun informacion con e app ta, pakico e app ta bao di AAA. Pasobra e minister a bisa cu e no por hink’e bao di DTP. Awo con e sistema di e app ta bay traha.

 

Sin consulta

E minister a tuma un decision sin consulta. Tin otro cosnan cu mester drecha. Tur hende sa cu e landsverordening mester ta modernisa. Unico cos cu a update den e landsverordening ta e sancionnan. Pero por lo general, nada mas. Ta bin cu un app, enbes di pak aan e situacion cu e taxistanan tin, no ta bay drecha nan situacion na DTP.

Chauffeurnan di taxi no ta hayando papel pa bay SVB pa dokter. Sin e carta aki e no por pone un hulpchauffeur traha y ta keda sin entrada. Nan tin falta di personal. Nan no por haci control. Con nan ta blof cu ta bin cu un app y no tin e departamento cu ta funciona.

Segun Orman, Romero a enfatisa cu mester ta updated cu tecnologia. Masha bunita. Pero tanto bal tecnologia si e departamento no ta funciona.

E mester haci mescos cu Baez. E mester admiti cu el a neglisha e taxistanan y pone fecha pa reunion.

Comments

comments