Taxistanan malcontento cu faboritismo di hotelnan

Dos taxista malcontento, Bryan Lopez y Pierre Lacle, a combersa cu 24ora.com riba un situacion fastioso den area di hotelnan. Un situacion, unda nan ta sinti, cu cierto taxistanan ta wordo faborece of previlegia.

A sosode algun biaha caba cu taxistanan cu ta pasa dilanti hotelnan, ta haya turistanan wardando taxi. Sinembargo na momento cu puntra nan si mester ayudo pa yega un caminda, nan ta wordo para door di empleadonan di hotel, cu supuestamente ya caba a pidi un taxi.

Taxistanan malcontento cu faboritismo di hotelnan

Taxistanan malcontento cu faboritismo di hotelnan

Posted by 24ora on Saturday, June 8, 2019

Lopez, pero tambe Lacle, a splica cu nan ta compronde ora cu un turista tin preferencia pa haya transporte di cierto taxista cu nan tin un bon relacion cu nan. Of kisas hotel of restaurant ya caba a tuma contacto cu central di taxista. Tur esaki nan ta compronde.
Tambe nan ta bisa cu tin un palabracion entre e mas di 400 taxistanan cu tin, cu esun cu yega prome na un sitio ta transporta e turista(nan) cu mester di un taxi. Niun tin problema cu esaki. Otro cos ta sinembargo, cu un empleado ta yama un taxista personalmente, faboreciendo e colega, siendo cu tin taxi para of pasando dilanti e hotel y cu tin tempo pa haci e transporte.


A sosode recientemente cu un taxista a aserca un pareha sinta cu nan maletanan dilanti un hotel chikito, y kende tabata haci señal cu nan. Pero asina cu nan a yega cerca, un empleado a sali bin pafo informando cu no mester, pasobra el yama un taxi caba. Y practicamente a core cu e taxista. Tabata e di dos taxi cu a pasa, cu si a dicidi di hiba e turistanan pa nan destinacion y despues a bolbe pa combersa cu e empleado di e hotel, kende porcierto a mustr’e su dede di memey ora cu el a rabia. Esaki no por, Lopez a bisa. Ora cu el a bolbe pa colmo, e empleado no kier a atende cun’e y tabata sigui  haci su trabou na computer. Lopez ta condena e forma aki cu cierto hotelnan of nan empleado ta uza. Esta di haci uzo di un grupito di taxista cu nan ta faborece, y no sa pa ki motibo, pero perhudicando otronan.