Taxistanan hopi emociona pa ricibi prome pasaheronan despues di casi 4 luna

Linda Orman, vocero di Taxistanan Uni,  tabata na aeropuerto na momento cu frontera cu Merca a habri pa ricibi e prome turistanan cu a yega riba e 5 vuelonan cu a yega diabierna merdia pa atardi.

Sra. Orman a cuminsa pa bisa cu den e situacion cu Aruba ta na e momentonan aki, no por permiti e luho di no habri su portanan. Tin hopi taxista cu tin mas cu 100 dia sin entrada. Awe mes tin taxista mester a sinta 3 ora na aeropuerto prome cu nan a logra haya nan prome cliente.

Taxistanan hopi emociona pa ricibi prome pasaheronan despues di casi 4 luna

Taxistanan hopi emociona pa ricibi prome pasaheronan despues di casi 4 luna. Click link pa mas https://24ora.news/2OfnbpG

Posted by 24ora on Friday, July 10, 2020

E ta mustra con dificil e situacion ta, cu un inicio hopi lento. E expectativa no ta “rooskleurig” pa yega bek na e situacion prome cu coronavirus lo dura 2 pa 3 aña.

Prome turistanan for di Merca saliendo di Aeropuerto rumbo pa disfruta nan vakantie

Asina nos frontera a habri pa Merca:Prome turistanan for di Merca saliendo di Aeropuerto rumbo pa disfruta nan vakantie

Posted by 24ora on Friday, July 10, 2020

E ta adverti cu Aruba ta bay pasa den duro pa algun tempo ainda, pa cual mester tin pasenshi. E ta pidi si pa no lubida cu turistanan ta bini Aruba pa amabilidad di su hendenan, e solo y e beach. “Ban mantene esaki nan pa nan tin e confiansa pa bolbe Aruba. El a pidi tambe pa tur hende cuida nan mes pa evita un brote.

Taxistanan ta na altura caba kico tur ta e medidanan di precaucion cu mester tin. Nan ta uza mask, autonan cu no tin glas memey ta traha sin airco, pa circulacion di aire, ta uza material manera paper towel, hand sanitizer. Turistanan mester uza mask y turistanan sa esey.  Na final “ban clean e auto y spera pa e siguiente pasahero,” el a bisa.

Taxistanan tabata hopi emociona pa ricibi e prome turistanan internacional cu a yega Aruba. Nan ta spera cu esaki ta e comienso pa un miho futuro cu e ultimo lunanan tras di lomba.

Miriam Halligan, hulpchauffeur, a combersa hopi cu coleganan riba nan situacion y awe para den fila wardando e avionnan baha, nan a sinti nan mes hopi emociona di por cuminsa traha bek. Aunke a habri siman pasa bek, awe a yega e prome turistanan internacional despues di casi 4 luna.

E ta un persona hopi positivo y yen di fe. E ta kere cu e crecemento lo bay poco-poco y crece den un forma regular. “Tanten cu tin 10, 20 of 30 florin riba mesa nos ta contento, pasobra prome no tabatin nada,” el a bisa.

E ta compronde e hendenan cu ta preocupa pa habrimento di frontera. Pero mester compronde cu economia mester cuminsa draai.

Otro taxista presente na aeropuerto tabata Franklin Besselink, kende ta contento cu e temponan dificil y hopi duro ta cuminsa mira cambionan chikito, cu yegada di e prome vuelonan internacional. “Mi ta contento cu cos a cuminsa draai aworaki, aunke ta 4 vuelo pa dia. Algo ta algo. E ta un comienso,” Besselink a splica. Nan a scucha cu tin 2 pa 3 mil pasahero internacional yegando e siman aki, cu ta un indicacion cu poco-poco cos ta cuminsa drecha. E ta percura pa placa den saco y cumpli cu nan compromisonan.