Apesar cu frontera a habri, Taxistanan ainda ta pasando den un situacion hopi dificil. Tin biaha mester sinta wardanan oranan largo y kisas ta haya un cliente so pa dia. Un situacion alarmante pa nan.
Ronny Gomez, di Taxi 343, ta hopi preocupa. “E hendenan ta papia cu hopi turista a cuminsa yega, pero nan no ta suficiente pa e mercado di taxistanan. No mester lubida cu tin 450 taxi, pero tambe tin bus y carrentalnan.”
El a splica tambe cu por ehempel si tin 4000 persona ta yega, no mester lubida cu mayoria ta yega cu nan pareha of famia y ta haci uzo di un solo transporte. Aworaki un taxista, si e tin suerte, mester para 3 ora prome cu e haya un trabou. Mientras cu tin dia nan no ta haya ningun biahe. Tin di nan ta yega mainta tempran pa logra haya cliente y otronan ta traha fin di siman so.
“Realidad ta cu nos ta struggle pa e tiki hendenan cu ta bini. E ta yuda un tiki pero e no ta gran cos pasobra tin hende cu no ta haya trabou mes. Tin ta yega 5’or di mainta pa haya un cliente te 1’or of 2’or di merdia. Awo pio cu ta den september cu ta e luna di mas slow pa turismo,” Gomez a bisa.
Awo mayoria di e taxistanan ta biba di FASE, e no ta cubri e gastonan, pero ta yuda un tiki. P’esey nan ta spera cu pa luna di november e situacion por cuminsa mehora. Aruba mester di turismo pa sobrevivi.
