Pa basta dia caba ta circula e rumor cu un taxista ta deteni pa extorsion y droga. Sinembargo no por a confirma esaki pasobra e auto tabata circula normal riba careteranan di Aruba. Awe e confirmacion a drenta cu ta berdad cu Recherchenan a detene e taxista Diolitza Juraine Wouters, di TX 214, hunto cu su pareha.
Team di 24ora.com a cuminsa averigua y a bin haya confirmacion di e detencion, pero e no tin nada di haber cu droga.
E taxista femenino ta un persona cu ta presta placa. Aparentemente el a fia coleganan placa y nan no tin fin di cumpli cu pago. Mirando cu tempo ta pasa, el a dicidi di haci uzo di su pareha, un Venezolano kende aparentemente ta ilegal tambe, pa pone presion riba su coleganan. E malo ta cu el a bay cobra e hendenan, den compania di su pareha, kende a haci uzo di un arma di candela pa obliga e hendenan cumpli cu e taxista prestamista. Un situacion hopi serio pa cual algun di su coleganan cu a sinti nan mes menasa, pa cu nan bida, a dicidi di entrega un keho na Polis.
Autoridadnan cu keho den man a dicidi di actua. Despues di a haya e permiso necesario, a tira un inval na cas di taxista unda cu a detene e pareha. Ora cu a rista e cas, a topa tambe cu un arma di candela, cu awor ta bay averigua si ta e mesun uza pa menasa e taxistanan.
Aunke cu den e caso aki no tin un condena ainda, su demas coleganan ta cuestiona con por ta posibel cu su vehiculo ta sigui core, crea placa mientras cu Wouters mes ta cera. E ta haciendo uzo di un hulp chauffeur. Ta pensa cu ta door di su conexion cu Gobierno of Minister, cu ta permiti pa e sigui haci uzo di su permiso. Mirando e seriedad di e caso aki, lo normal ta cu ta schors su permiso te ora cu tin un decision riba e caso aki. Su coleganan ta keda pendiente pa kico ta bay pasa.
