Taxi Unie na Minister: “Sea macho den bo sapato”

Taxi Unie hunto cu centralnan a tene un conferencia di prensa den Kowloon Restaurant unda cu nan a expresa nan mal contento pa e hecho cu nan tin basta luna sperando riba un reunion cu Ministernan Andin Bikker y Chris Romero.

“Sea macho den bo sapato,” ta e mensahe cu Blanca Orman di Taxi Unie a manda pa Minister Bikker y Romero. Despues di a duna un relato di tur e preocupacionnan cu nan tin cu nan no ta wordo scucha, a duna un periodo di dos siman pa nan haya un reunion cu e Ministernan concerni. Si no logra, nan lo tuma e decision pa acerca Prome Minister. E motibo ta cu nan ta sinti cu Gobierno no ta atende cu pueblo, e organisacionnan cu tin preocupacion.  “Pueblo a pone boso eynan y boso mester atende problemanan di pueblo.”

Taxistanan preocupa cu desaroyo den transporte publico.

Posted by 24ora on Thursday, September 12, 2019

Pa hopi tempo no a tende di e grupo aki pasobra nan tabata concentra riba traha e.o. e pricelist nobo pa entrega na Gobierno. For di dia 2 di april a cuminsa cu intento pa haya atencion di Minister Bikker inicialmente y despues Minister Romero. Pero sin resultado. Nan puntonan di preocupacion ta un areglo mas husto den transporte publico, un miho sistema pa ora cu nan mester baha of recoge clientenan den area hotelero y na Playa; y por ultimo, un miho proteccion pa dañonan causa pafo y den nan auto door di nan clientenan.

Pa haya contacto cu e oficina di e Ministernan mes tabata un problema, mester a haci casi 100 yamada prome cu a haya contacto cu nan. Y despues di esey a haya un number. A haci promesa cu lo yama un reunion, cu e instancianan concerni, y te cu diahuebs mainta ainda ta sperando fecha pa e reunion aki tuma luga. Pues for di april a trata di haya contacto y a logra esaki te na juni ora cu a priminti nan un reunion cu ainda no a tuma luga. “Increibel cu nos tin cinco (5) luna pa warda pa un reunion di tres (3) punto. Nan tabatin suficiente tempo pa prepara nan mes,” Orman a bisa.

Taxi Unie, el a bisa, no ta e uniconan cu no ta wordo atendi door di Gobierno. Por a scucha diferente organisacion ta reclama cu nan peticionnan pa reunion ta wordo neglisha. “Nos no ta compronde pakico di e miedo pa reuni y busca solucion. Nos ta mira cu no tin interes pa sinta y yega na solucion pa e problemanan.

Nan kier pa Gobierno actua lihe pasobra tin hopi cos ilegal tumando luga den mundo di transporte. Semper ora cu nan reclama, ta papia cu no tin suficiente personal. E maneho di “laat de boel maar waaien” no por sigui den opinion di e taxistanan. Unico cos cu Gobierno a haci ta adapta e ley di transporte pero pa pone boet riba e taxistanan. “Locual nos ta pidi no ta algo imposibel,” Orman a termina bisando.