Core taxi na Honduras tabata un trabao pa hende homber, den un pais di machista, pero esey no a stroba pa e damanan cuminsa brinda e servicio cu un dama na stuur na San Pedro Sula, nort di e pais, den unidadnan color ros, exclusivo pa damanan, cu mas medida di siguridad.
E servicio mester a cuminsa diahuebs cu e prome taxi, pero pa un inconveniente di ultimo ora, asocia cu e pandemia di COVID-19, lo keda posponi te cu otro siman, e presidente di e Cooperativa de Transporte Taxista Hondureño Limitada, (Cotaxihl), Henry Rodas, cu ta promove e proyecto a indica na Efe.
Pa garantisa un miho servicio, e taxinan ros exclusivo pa hende muhe lo dispone di un sistema di GPS di e unidad, un camara externo y otro interno, un “panick boton” y contacto inmediato cu 911 pa cualkier emergencia, Rodas a splica.
E presidente di Cotaxhil a señala cu e idea di e cooperativa ta cu pa mas hende muhe join na coremento di taxi y converti den empresarionan di e sector.
Te awor aki a inscribi tres hende muhe pa e proyecto, pero ta spera cu pa december tin por lo menos 15 pa 20 taxi ros circulando den San Pedro Sula, aunke Rodas ta considera cu e iniciativa aki tambe mester ta impulsa den otro ciudadnan manera La Ceiba, Tegucigualpa y Choluteca, den Caribe, centro y sur di Honduras.
Onderschrift potret: Julia Wilson, chauffeur certifica, ta stuur un unidad di e taxinan ros cu tin como nomber “Taxi Sheula,” diahuebs, na San Pedro Sula (Honduras). EFE/José Valle
