Taxi App no ta bon mira cerca taxistanan

2480

Ronny Gomes ta chauffeur di taxi 343 y ta conta di e disgusto cu tin entre e taxistanan relaciona cu un app. Un herment cu a trece basta problema pa e taxistanan. Gomes ta splica cu e app aki no lo bay funciona na Aruba. Tur e centralnan por a bin cu un app.

Ta papiando pa mehora e servicio di taxi, pero no ta indica si ta na altura si servicio ta bon of no. “Tur hende por subi riba YouTube y wak algo. A coy algo y a pensa cu por tin 450 taxi y haci un calculacion cu ta gana un cantidad grandi di placa riba e trabao di e taxista sin cu nan mes ta haci algo.”

E taxinan mes por a bin cu e app, pero no a hacie pasobra aworaki Aruba tin cinco central cu ta funcionando masha bon. Den e sistema aki, e turista no conoce e chauffeur, e tin di yama un number di afo pa haya un taxista. Cu e sistema actual for di aeropuerto pa lighthouse, tur taxi ta cubri. Unda cu e turista bay tin taxi, pues no mester keda warda pa e servicio aki.

Taxi App no ta bon mira cerca taxistanan

Taxi App no ta bon mira cerca taxistanan

Posted by 24ora on Saturday, October 17, 2020

Aki na Aruba 99.9% turista ta coy taxi y no local. E grupo ta bin cu proyecto di paisnan grandi, caminda localnan tambe ta haci hopi uzo di taxi. Gomes ta comenta cu hopi taxista a kere cu nan ta paga pa e app pasobra nan ta kere cu nan ta haya mas trabao, pero e ta al contrario. Loke nan ta sinti ta cu tur hende ta busca taxi pa gana placa riba dje. Ta kere cu esaki ta un trabao dushi y cu por gana placa.

El a ilustra e situacion cu hopi hende ta bin Aruba, habri negoshi sin studia e mercado, keriendo cu ta asina cosnan ta bay. Taxistanan no mester di ningun hende pa bin yuda nan den nan trabao of pa mehora servicio.

Na Aruba, como bon ciudadano, unda cu bo bay, sea restaurant of unda cu ta, nos Arubianonan ta coy un telefon y yama un taxi. Sea ta yama e taxi direct of central.

No ta tur cos cu bin riba mercado ta funciona pa Aruba. “No ta pasobra nos ta bira mas moderno, sino tin cu bay segun e cultura y si tin suficiente mercado p’e. Si ta kere cu ta bin cu un app cu awor aki ta lanta yen di problema entre e taxinan, e no ta funciona.”