Tata cu a saca yiu na estado manda KIA

2862

E ta un situacion penoso pa e victima, pero cu awe por lo menos e ta trankil pasobra esun responsabel cu a mark’e pa resto di su bida, ta sintando su castigo den KIA.

E homber aki A.J.A. ta wordo acusa di a tene relacion sexual cu un persona menor di edad na juni y juli 2018. Na momento di e sucedido, e menor tabatin 15 aña y e hecho cu den e caso aki ta trata di su propio yiu a hunga un rol mas pisa den e castigo pidi y imponi.

Den e declaracion cu e hoben a duna, ora cu e mama a hib’e haci e denuncia, ta cu e hecho a tuma luga contra su boluntad.

E tratamento di e caso a tarda pa motibo cu e homber a nenga di a comete e hecho. Ora cu e menor a sali na estado, a dicidi di comete abortus mirando cu no solamente e ta contra su boluntad pero e hecho cu el a bisa cu ta su mesun tata ta esun cu a obligue pa tene relacion sexual. Despues e mesun mama a dicidi di bay autoridadnan y na mesun momento haci denuncia oficial.

Pero e procedura tabata largo e momento ey, despues cu e homber (tata) a nenga. E denuncia a bini te ora cu e mama a constata cu e menor ta na estado y no tin otro prueba mas e momento sino e DNA di e fetus.

Despues di e investigacion preliminar cu no a logra haya su confesion, mester a tuma otro paso di manda e fetus Hulanda, pero esey ta un procedura basta largo.

Confrontando e homber cu e realidad, cu e prueba cientifico riba mesa, e no por haci nada otro cu admiti.

Den e caso aki Ministerio Publico a tene cuenta, ora di su demanda, cu loke ta impone den casonan similar na Hulanda y na e islanan Hulandes. Asina a yega na e demanda di 4 aña y mey. Un demanda cu Hues tambe a haya ta na su luga y a dicidi di impone esaki mesora, ya cu no tabatin mester di tempo pa evalua nada mas. E homber aki a hay’e di biaha den boei, pasobra e momento cu el a presenta ainda e tabata liber. Pues for di Corte pa KIA.

Hopi hende lo puntra pakico no ta uza nomber di e acusado aki. Den tipo di casonan asina ta pone den balans e pro y contranan. Hopi aña pasa Ministerio Publico y Corte a yega na un palabracion cu miembronan di prensa specificamente pa tipo di casonan asina. Ta papia di casonan di abuso sexual ora cu e acusado y e victima tin un relacion di sanger.

E victima ta pasa den hopi dolor y berguensa caba cu esnan rond di dje. Si haci nomber di e tata publico, tur hende ta haya sa kende e victima ta. E ora no solamente ta castiga e homber / esun cu a comete e acto, pero tambe ta castiga e victima, kende mester wordo protegi. Ta pa e motibo aki a yega na e palabracion cu prensa por ta presente pero respetando e palabracion.